《無啦啦多左幾個家姐同細妹Season 3》: 過去

無諗過五年幾之後既第一次見面居然會搞成咁。
 
不過…算啦而家咁樣都唔算係咩壞事，至少叫做兩全其美，佢又唔會再受傷，而我又接返呢兩個細路。
 
睇住佢兩個一臉期待咁望住我，我內心就好過意唔去，連直視佢地我都唔敢。
 
但而家既我又可以做到D乜，唯一唔傷害到兩邊既辦法就係咁，咁就只可以咁做。
 
雖然知道咁既做法一定唔係可以算得上係好，但唔緊要，佢地要嬲要憎我我都無所謂，始終搞成今時今日咁既局面全部都係我一個人既責任，自己承受返都好應該。
 




月：「家姐我地係咪一齊返去啦？定係要留係香港？」
 
日：「唔好咁快返去啦，咁難得返黎香港，我仲有好多想食既野未食到啊。」
 
月：「吓？？咪就係因為你淨係掛住諗辦法教訓陳煒明，所以你先無時間去掃街咋嘛。」
 
聽到佢地提起佢既名既時候，我不自覺咁望左過去佢地個邊，咁岩佢地又望過黎，大家對望既一瞬間空氣好似凝結左一樣，無地自容既我就只好起身暫時回避一下。
 
無錯，雖然我係收養左佢地兩個，但我並未要求佢地視我為佢地既媽媽之類既角色，我只係想佢地當我係佢地既家姐，咁就已經足夠。
 




而家諗返三年前，真係無諗過自己會做出一個咁大既決定，自己都未搞得掂居然膽粗粗走去收養呢對兄妹，仲要幫佢地改個咁既名。
 
我個一刻到底係諗緊咩呢？係單純想幫呢對可憐既兄妹定係有私心呢？
 
哼，呢個問題而家應該大家都知道答案啦。
 
當時我係日本幫公司做野，遇上被逼流落街頭無依無靠既佢地，就唔知點解想幫佢地。
 
而家睇返，其實只係因為自己寂寞，想身邊有人可以陪下我所以先咁做。
 




不過呢兩年幾同佢地兩個既生活真係幾開心，如果你問我有無後悔收養佢地，我可以好明確話你知，無。
 
唯一後悔既就只有幫佢地改左呢個名。
 
就係因為呢個一時之間既私慾，造成今日既局面，甚至傷害左我真正既屋企人。我都唔知道可以點面對Sarah佢地。
 
而家我暫時帶住佢地兩個返去我係香港既其中一個住處，雖然只係一個單位，但要住三個人絕對唔係問題，仲可以話相當寬敞。
 
暫時…就咁睇住佢地先啦，畢竟暫時我仲有唔少野要處理，未可以行得開。
 
但之後要點做我都唔知道，至少呢刻仲未諗到，安頓好佢地先再算。
 
我：「你兩個呢排都唔好出去住啦，畢竟之前件事都算有刑事成份，警察或者會主動查，係我擺平件事之前你地就避一避風頭先啦，知唔知。」
 
日：「知道…」




 
月：「係咪衰呢，睇下你俾左幾多麻煩家姐。」
 
我：「唔緊要，最緊要係人無事，但唔好再搞呢D野啦知唔知。」
 
佢倆再無回答，只係默默點頭作回應，而我就踏前數步將佢地擁入懷中，呵護眼前呢兩個因為我而受苦既小朋友。
 
心裏亦暗自道上數萬次歉。
 
係天晚變得夜深，佢地開始休息既時候，我自己一個返到客廳，一邊望住並無啟動漆黑一片既電視，一邊回想起今日既一切。
 
最後湧進心頭既都只有數之不盡既難受。
 
就係呢刻，門鐘響起了。
 




邊個…？邊個會知道呢個地方？
 
我抱住戰戰競競既心態，慢慢打開大門，想睇下來者何人，豈料只係打開左少少，門外既人就突然用力強行打開大門，嚇左我一跳。
 
但好彩對方並唔係咩壞人，我先鬆一口氣。
 
姐：「Hi~阿May~我黎探你啦，做咩開門開咁慢架，等到我都有D唔耐煩。」
 
唔知原因，呢一刻見到家姐好似為我舒解左唔少心中既鬱悶。
 
我下意識就撲左上去，抱住眼前我呢一位唯一既家姐。