《無啦啦多左幾個家姐同細妹Season 3》: 鬧劇

五年來既第一次見面，無諗過會係以咁既形式下實現。
 
我稍稍望一望係我旁邊既Ashley，亦即係阿月佢既反應，嘗試窺探出兩者之間關係。
 
只見佢雙眼發哂光，好似見到超級大明星咁，咁就證明佢係識得二家姐。
 
但點解二家姐會係度…？仲識得日同月？？
 
晨：「唔好意思喎May姐，我唔可以交佢地比你，原因係咩你應該好清楚。」
 




「如果你想夾硬搶的話，可以試下既。」
 
晨哥係我未黎得切反應之前就已經一口拒絕左二家姐呢個突如其來既請求。
 
二家姐：「阿晨，信我，交佢地俾我件事就可以完，無人會再受傷，咁唔好咩？」
 
晨：「um….我唔肯定自己想唔想無人會再受傷啵，至少呢個人我要佢受返多少教訓我先心安，佢太囂張了。」
 
就係呢刻，我忽然聯想到一個可能性。
 




我：「你…到底係咪我二家姐。」
 
當我講出呢句說話既時候，全場靜哂，空氣都好似凝固左咁。
 
打破呢個困局既，亦係二家姐，應該話疑似二家姐先岩，佢捂住額頭，嘆左一口氣，但除此之外佢就無講任何野。
 
呢種態度反而令人更加着急，更加焦燥，特別對象可能真係已經好耐無見既二家姐。
 
晨：「嘛冷靜D先啦，佢的確係你二家姐。」
 




我：「但係…佢有可能用左個款光學mask黎扮二家姐…」
 
晨：「啊的確有咁既可能，但佢有無需要咁做？點解專登扮你好耐無見既二家姐？而且經過頭先既對話，你應該知道日同月所指既就係你二家姐，只係你自己一味想逃避呢個事實。」
 
我…？逃避？
 
即係話其實係我令到二家姐痛苦？點解？
 
係晨哥近乎當頭棒喝既說教之下，我再一次望向眼前呢位二家姐。
 
今次佢既態度有所不同，唔再係不瞅不睬，而係變得一臉尷尬，面有難色。
 
「對唔住。」
 
佢同我講既就只有呢三個字，之後就再次轉過臉望返去晨哥度。




 
二家姐：「我再講多次，將佢兩個交畀我，呢件事去到呢度就完，OK？」
 
晨：「唔可以，就算你講幾多次都好，我都唔會…」
 
我：「交俾佢啦。」
 
短短既四個字，卻花光我全身既力量先講得出口。
 
得到既反應亦如我所料，大家都用十分錯愕既眼神望住我，晨哥，二家姐，甚至連月都係一樣。
 
無諗過用左咁多時間精力，最後結果居然會係咁…起初仲以為邊個同我咁大仇口，結果居然係二家姐…
 
但如果件事真係可以就此告一段落的話…咁都唔係唔可以接受既…
 




而且…就算而家唔放走佢地又可以點，困住佢地一段時間最後殺左佢地出氣？無可能啦，況且我之前都已經講左想就咁算，而家搞清楚哂，放佢地走都唔係咩問題。
 
晨：「喂你講真？真係放人？搞左咁多野最後就咁收手？」
 
我：「嗯…算啦，如果二家姐真係想要返佢地，就比佢地啦，如果件事真係可以完對大家都係好事黎。」
 
晨哥好似非常唔滿意我既決定，但都係決定聽我講，首先推左月過去比二家姐。
 
至於對阿日，晨哥就無咁好態度了。佢選擇從後大大力一腳踢向阿日度，令佢向二家姐既方向仆。
 
二家姐見狀馬上向前扶起佢，仲試圖解開佢手上既鎖扣但唔成功，於是轉而望住我地。
 
晨哥好不情願咁按下手上既遙控器，日月既鎖扣先至解開，二家姐馬上拆左出黎，扔埋一邊，逐個逐個扶上佢既七人車。
 
就係二家姐自己都準備上車之際，我把握機會叫住左佢，成功令佢回頭一次。




 
我：「Sarah佢地好掛住你，如果有時間的話…就返黎見下佢地啦，佢地一定會好開心…」
 
「我都係一樣…」
 
可惜既係，今次我無得到任何既回應，佢聽完之後就上車離開，無理到我。
 
最後居然發展成咁…變成一場鬧劇…