《無啦啦多左幾個家姐同細妹Season 3》: 相見

啊…好悶呀…佢哋咁耐都未返黎既，唔通佢哋說服唔到人？
 
唔…都唔意外既，畢竟人哋都係有考慮過唔同因素先決定賣唔同數量既食物券，又點會好似班大力咁如此輕易用辛苦得來既金幣。
 
唉點都好，先整理好剩低既野飲先啦，佢哋頭先pack野飲搞到周圍都係，亂過亂葬崗。
 
好彩我平日照顧幾位大小姐有經驗，對執返整齊d野有一手。
 
諗返起最麻煩一定係Sarah，佢超鐘意買衫買飾物仲要放到成房，最癲個期我同Yui幾乎每三日就要幫佢執一次房。
 




無辦法啦鬼叫佢貪靚咩，又真係比佢打扮得靚一靚呢下攞命。
 
如果可以而家見到佢哋就好lu，不過邊有可能吖哈哈，佢哋呢個鐘數應該已經敷緊mask準備訓覺啦。
 
就算佢哋真係無訓都好，都無可能係呢度出現啦，佢哋邊會知呢度。
 
唉真係渡日如年呀大佬，明明只係幾日，做乜感覺過左幾年咁架。
 
去拎支茶飲下先，記得雪櫃雪左幾支。
 




「乒！~」
 
嗯？做乜廚房會有聲既？
 
唔通…真係有人想黎偷金幣？如果係真既話，等我打佢班仆街一鑊先，呢幾年練拳無偷懶既成果終於可以派上用場了。
 
我戰戰競競，一步一步慢慢行去廚房，仲故意收細腳步，免得打草驚蛇。
 
當我行到去廚房門口既時候，果然比我發現到有個人影係度鬼鬼祟祟。
 




仆你個街咁撚大膽夠薑單拖走入黎偷野？等阿叔我一掌打死你等你輪迴做中國人！
 
但就係我既會心一撃即將打落去既一刻，條友擰轉臉面向我，仲好驚訝咁嗌左出聲。
 
我從來無為自己有咁好反應力而感到高興，居然停得切呢拳。
 
唔…點形容而家呢個畫面好呢？呀係，《SEED》第一集最尾阿斯蘭揸刀差D拮落基拉度個個畫面。
 
如果我真係打左落去，我肯定會痛不欲生。點解我會咁講？
 
因為眼前呢個鬼鬼祟祟既人竟然就係我岩岩諗起既Sarah。
 
Sarah：「嘻嘻，你好呀阿明~」