《無啦啦多左幾個家姐同細妹Season 3》: 開戰

大家對我呢個提案開頭十分驚訝，但透過Ray同阿輝既分析之後發現咁係一個可行既方法，佢地仲就此好快擬定左兩三個策略，可以對應唔同既情況。
 
大概就係咁了，係開始之前都再無乜野可以做了，大家就地解散，約定到時再見。
 
係返去既路上，我拖住Ellie係大街上慢慢行，一邊模擬返頭先討論過既情況。
 
如果真係可以咁順利就好喇，唉屌諗咁多把撚咩，學阿嵐話齋，未知既情況一定會有，最重要係識隨機應變而唔係作無謂既擔心。
 
啊係喎，問下Ellie點睇呢幾條友先。
 




Ellie：「嗯？咩點睇啊？」
 
我：「點講好呢？你覺得呢幾個人作為生意上既拍檔點呀？」
 
Ellie：「唔…各有特色咁囉，雖然效率上未必好好，但應該唔會有乜大衝突既，做小生意應該ok。」
 
我：「我諗都係啦可哈哈哈，機會難得，我地兩個去行下先返去咯？」
 
Ellie：「可以呀，你想去咩地方？睇衫定係睇玩具？」
 




居然問我睇唔睇玩具…Ellie你真係吖…正常女仔同男朋友行街邊會話去睇玩具架。
 
我：「唔…去睇衫吖，我想睇你買衫。」
 
Ellie：「吓？但係我無衫想買喎…」
 
我：「唔怕啦行行下就有想買架啦，再唔係咪當揀份禮物比你家姐囉~黎啦行啦~」
 
今次我再無等到徵求佢既同意，就一意孤行咁拖走左佢，帶佢去搵附近既時裝店。
 




起初佢都仲有小小抗拒，連續經過幾間都過門而不入，只係係門外望住櫥窗display出黎既衫，之後又拉我走去下一間，重複好幾次都係咁。
 
直至去到一間比較細既鋪，佢終於停左落黎，望住入面。
 
我：「Ellie?」
 
佢並無理我，而係直接帶左我入去，仲開始睇衫。
 
雖然過程係有D奇怪，不過結果符合目標就得啦係咪先。
 
佢睇衫既方法都幾得意，人地一般都會將件衫放上身，走埋去塊鏡度照下睇下件衫岩唔岩自己，但佢完全唔係，佢只係拎起件衫，摸下件衫既質地就決定拎入試身室。
 
不過其實諗落都幾有Ellie風格既哈哈，唔知佢試完出黎會係點呢？
 
靚就一定架啦，但我想知仲會有咩感覺？仙氣？定係美艷？嘻嘻淨係諗下都已經好期待，好想快啲見到…咦喂…？搞乜呀？




 
我滿心歡喜咁期待，你居然俾D咁野我睇？會唔會太無良心呀Ellie？
 
我之所以話佢無良心，係因為佢居然換返自己衫出黎呀！！就連人地老闆娘都打左個突呀。
 
我：「做乜呀Ellie，件衫唔啱著呀？」
 
Ellie：「嗯？唔係吖，唔該你我要呢件吖，同埋個邊個兩件藍色同紫色既我都要埋，麻煩哂。」
 
佢無理我。 仲拎住件衫去搵老闆娘比錢，老闆娘同埋我對望左一眼，好似想問下我意見咁。
 
我可以點啫，咪唯有點下頭俾老闆娘計數。
 
俾錢個下都搞左一大輪，Ellie個衰妹唔肯比我比錢，但我又真係好想買D野比佢，一場爭比錢大賽就咁係人地鋪頭上現。
 




最後都係我贏左，成功保得住男人既尊嚴。
 
當然，袋衫都係我拎喇，男人黎架嘛。
 
係返去既路上，我偷望左套衫一眼，發現入面都係晚裝裙，啊即刻諗起當年grad din了，當年大家都著得好靚，令到我幾有face屎呀。
 
我：「乜你最近有party要去咩？突然買幾條呢D裙既？」
 
Ellie：「最近既話無呀，不過家姐成日話我無乜晚裝裙，應該要買多一兩套以備不時之需，所以我咪買囉。而且呢d係留俾一個黎緊好重要既場合既。」
 
我：「哦？有乜好重要既場合呀？」
 
Ellie：「你既慶功宴囉~咁都唔重要咩？」
 
啊…呢條友吖…咁突然俾個炸彈我都有既，叫人點俾反應喎…





慶功宴呀...我都唔係好敢諗呢D野住...

盡做啦屌。
 
如是者，又過左好幾日，今日就係「入camp」既大日子。
 
點解會叫「入camp」？因為大家都覺得呢次其實同入camp無乜分別，又係入一個營地留幾日咁。
 
只不過，呢個camp係可以影響我地之後既人生，份量可以話完全唔同，你可以feel到周圍甚至有唔尋常既敵意。
 
大家都係度互相打量緊對方，當然我地都唔例外。
 
無錯，大家心入面都好清楚，要開戰了。