《無啦啦多左幾個家姐同細妹Season 3》: 約會

居然仲有第二輪？唔係又要我地再present多一次呀？
 
我：「大家姐，第二輪審核係咩？唔會又係要present掛？」
 
大家姐：「嘻嘻，呢層我就唔講得啦，我諗三個工作天內基金個邊應該會有人通知你地架啦，總知呢就加油啦，大家姐睇好你地架。」
 
「好啦正經野講完，個肚都開始餓，有飯食未呀？」
 
Yui：「呃…應該差唔多得架啦，我而家去睇下蘭姨有無野要幫手先。」
 




Sarah：「啊！咁我地都一齊去啦，大家姐同阿明你地兩個去洗個臉換件衫啦先啦~」
 
係Sarah既指揮下，我幾位女王都揮軍前住廚房，留低我，大家姐同埋隻貓係門口。
 
大家姐：「哎呀~~好攰呀今日，聽左咁多人present~點呀亞瑟~~等我抱下先~~」
 
大家姐一手就捉起隻貓，可謂鬼影擒拿手，隻貓連動身既機會都無就已經比佢捉住左，睇到我目瞪口呆。
 
我：「亞瑟？隻貓個名叫亞瑟？我真而家先知喎哈哈。」
 




大家姐聽到之後即刻擺出一副錯愕既表情，好似直頭想用表情講「唔撚係呀」四個字咁。
 
大家姐：「隻貓其實Ellen妹妹佢地都養左好耐架啦喎…你連佢個名都唔知道架？」
 
我：「eh…始終呢排我都比較忙吖嘛，幾乎日日都要同我D拍檔傾計劃書既野。」
 
大家姐：「咁唔得喔阿明，你知唔知道點解最近佢地成日都聚係度呀？」
 
我：「唔？唔係平時都係咁架咩？」
 




大家姐：「eh…好似又係wor…哎唔係！我意思係佢地緊張你！所以先一直守係度，想隨時可以見到你，睇下你有無野要幫手咁。」
 
唉，你估我唔知咩…
 
大家姐：「有一個明確既目標，等自己可以一直向前衝係一件好事，但因為咁而忽略左一直係身邊支持自己陪住自己既人，自己一個人衝得太前就唔係咁好啦。」
 
「有時D野呢，係要同身邊既人一齊完成，一齊分享成功個份喜悅先會特別開心架知唔知？」
 
「趁呢幾日未正式公佈結果同下一輪既詳情，抽D時間同佢地出下街拍下拖放鬆下啦。」
 
嗯…都岩既…
 
一於咁決定啦，同佢地出去玩下。
 
不過今次只有五個人…





我諗左好耐，都唔知應該點開口先好。
 
太耐無約佢地去街，都唔知開場白用乜先岩了。
 
而且去邊都仲未諗到，你知啦幾位大帝好難服待，一個唔覺意又會得失其中一個或更多。
 
所以每次既地點都要精挑細選過先得，啊只係諗起都頭痛了。
 
Yui：「阿明？係咪有乜事？做乜唔食野既？D野唔岩胃口？」
 
我：「啊唔係，咁好餸仲要你地有份幫手整喎~點會唔岩食呢，只係頭先有野諗緊分左心先停左手啫，而家即刻食！」
 
唔係Yui叫我我都唔知自己停哂手，成檯人都望住我…好尷尬…
 




Sarah：「點呀你~~又係度諗咩呀~」
 
Ellen：「妖，佢仲可以有咩諗吖，九成九仲係度諗緊個D計劃書既野啦。」
 
啊啊，你地睇下，我只係諗一諗野，Ellen就已經開始唔高興啦，所以真係要小心D揀地方先得。
 
不過當務之急都係先拆解眼前呢一個炸彈先，唔係的話真係分分鐘炸死自己。
 
我：「唔係，你唔好咁勞氣住，聽我解釋先~個計劃書仲有乜好諗啫，大家姐都話左俾我知我地入到第二輪囉，大家姐你話係咪？」
 
原本打算借助大家姐幫手化解下Ellen既怨氣，無諗過大家姐居然醉心於餐桌上既佳餚，根本唔理我地。
 
唉算啦，都係靠自己啦。
 
我：「唉話埋俾比你地知啦，我頭先係係度諗，自從決定搞生意之後，我都好似好耐無同你地出去玩，而家咁難得有好消息又有空閒時間，我都應該同你地出下去先係既…」




 
聽到我咁講，佢地幾個都停哂手望住我，特別係Ellen，佢既眼神再無帶住怨氣，反而變得興奮雀躍，十足十一個小朋友咁。
 
佢甚至突然企起身，大叫好野，大家見到都忍唔住笑左出聲，唯獨做細妹既Ellie顯得好尷尬。
 
Ellie：「家姐呀…坐返低先喇…呢度話哂都係人地屋企，況且仲有長輩係度架…唔好咁失禮啦…」
 
Ellen：「oops！sorry呀Uncle Auntie…我一時興奮得濟…」
 
得到Ellie既提醒，Ellen終於意識到自己奶左野，即刻坐返低仲用雙手掩住自己塊臉，連聲都變埋。
 
Uncle：「哈哈唔緊要，後生仔女活潑D係好事黎架，群得你地多我覺得自己都後生左添呀哈哈！」
 
媽：「人地只係聽到你話出下去就開心到咁，衰仔你肯定冷落左人地好耐喇！」
 




Yui：「唔好咁話阿明啦，佢都只係想做好件事啫…」
 
媽：「唉呀泳琦你唔好成日幫住個死仔喇，唔話下佢佢係唔會知錯架。」
 
喂大哥，我係你個仔黎架…唔幫我口都唔緊要，你仲要踩多兩腳？
 
Sarah：「唉呀唔緊要喇，最緊要大家開心，而家咁樣唔好咩？」
 
「係wor阿明，咁你諗到同我地去邊未呀？」
 
呃…話唔話比佢地知我仲未諗到好呢…
 
Ellie：「如果仲未諗到的話，我有一個好提議喎。」