《無啦啦多左幾個家姐同細妹Season 3》: 心中

Sarah道出事實之後，所有人都相當震驚，就只有浩銘一個一邊「哦~~」一邊點頭。
 
哎…我想傾正經野呀喂…
 
之後話題就係Sarah同浩銘既帶領下黎一個魯芬急轉彎，走向一個同原先計劃完全相反既方向。
 
佢地大談我既過去，例如我中學既事，仲描繪成一個勇者既故事咁。
 
不過，我既Sarah都仲係非常有分寸既，唔應該講既野一句都無講，特別係我地屋企既事。
 




阿嵐：「哦？原來阿明你咁多女架？你都收得幾密架喎…啊好眼訓…不過講返正經野先好無？我地決定點呀，參唔參加個基金呀，話時話個基金係apply就有架嗱？」
 
Thank God終於有個人記得咩先係正經野啦，仲要估唔到係平時最唔參與討論既阿嵐，真的謝謝你喔。阿
 
一聽到阿嵐提返正經野，大家既興致都即時被撲滅，好似被人淋左一盤冷水咁。
 
我：「當然唔係啦，你估人地真係錢太多無地方洗咩，要交計劃書同做presentation架。」
 
我講完之後大家甚至靜左落黎，睇黎係比要presentation呢下所嚇親。
 




大家敢做既，就只有攪拌面前既飲品，你眼望我眼。
 
過左一陣，阿Ray終於肯做突破口，開口為我地打破沉默。
 
Ray：「做啦，我地呢四年都做唔少present架啦，有乜好怕。」
 
阿輝：「喂分分鐘係班有錢佬玩我地架喎？我地真係自投羅網？」
 
聽到阿輝又講呢類說話，Ellen又無名火起，多得我同Sarah㩒住佢佢先無再鬧人。
 




正當我想加入說服阿輝既行列之際，阿Ray又再開口反駁佢。
 
Ray：「可能真係如你所講啦，但你又諗下，我地有乜可以輸？尊嚴呀？」
 
「如果唔去馬，我地咪打幾年工儲下錢囉，但你又有無辦法保證到我地一定儲到足夠既資金，又或者到時我地仲有而家呢團熱血同動力？」
 
Ray講得好岩，完全講中我心聲。有D野就應該一鼓作氣去完成佢，拖下拖下只會磨蝕自己既意志，最後失敗既機會亦會增加。
 
而且過幾年之後我會變成點，我自己都唔知道…
 
大家再一次靜左落黎，彷彿係度細味緊阿Ray頭先呢番說話。
 
阿嵐：「啊…既然阿明同阿Ray都贊成，咁就做啦…呢d機會又真係可遇不可求既，浩銘你點睇？」
 
浩銘：「唔…我不嬲都係跟大隊既方向，你地想做咪做囉~反正又無壞既。」




 
就係咁，大家既目光都集中哂係一直持反對態度既阿輝。
 
阿輝：「我知道喇，唔洗咁樣望住我既，我只係提出可能性啫，做啦。」
 
終於都全票通過，成功說服到佢地幾個，心中小不免有點激動同興奮。
 
距離自己既目標又前進左一小步了，雖然仲有好長好遠既路要行。
 
真係想話比Anna知，好想睇下佢會有咩反應，會係笑我定係鬧我呢？
 
唔得，今晚就要whatsapp佢問下。
 
之後我地又再傾左一陣，好似以前係大學傾project咁，傾一D…點形容好呢，「初步既細節」？唉是旦啦。
 




不過時間有限，要傾既野可以係無限，我地最後只係達成左一小部分方向上既共識，詳盡既留返日後再傾。
 
到離開coffee shop同阿Ray佢地道別既時候，已經黃昏了，咁就傾左一日，時間過得真係快。
 
Ellen：「阿明你呢幾個朋友真係各有特色喎哈哈哈，虧你地呢幾年可以相處得咁好。」
 
我：「其實都唔係一直都相處得咁好架，有幾次嘈得好勁，個排大家日日都面阻阻，都幾無癮。」
 
「不過話時話，你頭先無啦啦發脾氣鬧阿輝，真係嚇左我一跳。」
 
Ellen：「嘻嘻，似唔似Anna？」
 
聽到佢提Anna個名，唔只係我，連身邊既Sarah都嚇親。
 
Ellen：「做乜喎你兩個，而家唔提得佢個名架咩…我只係覺得如果Anna在場，佢一定會好似我頭先咁鬧個個阿輝啫…」




 
的確，我都相信Anna會講一樣既說話…只係一諗起Anna講個番說話既樣同埋佢把聲，心就無辦法平靜，好似有野緊緊握住咁。
 
Sarah：「嘛~唔好咁啦阿明，Anna兩年後就返，而且你身邊仲我地幾個呀~」
 
Sarah好似睇穿左我個心咁，一邊講一邊走過黎拖住我隻手，而Ellen亦不甘後人，拖起我另一隻手。
 
本來已經壓抑到極限既心情，係呢刻終於都守唔住，我立刻就係大街上抱住佢兩個，更唔理旁人既目光，當眾喊左出黎，最後仲要佢地兩個急忙截的士帶我走。
 
返到屋企，沖左涼，心情先慢慢平伏返，回想返自己頭先既失態，只能苦苦一笑。
 
就係此時，我電話收到一個訊息，起初我都不以為已，但一睇係Anna send黎，我成個人就慌了，差D就跌左電話落地。
 
打開Whatsapp，Anna已經唔係線上，留俾我既就只有一張相，係一個擁有一片綠油油既草地既小鎮，配上藍天白雲，風光如畫。
 




相下面其實仲有一個訊息，係一個有聲既文字訊息。
 
「傻仔明~😘」
 
任何時候，你都係我心入面，你知唔知道？