我要係20歲之前，將女神變做女朋友: 第十一節:化愁

就係因為依餐飯我同小櫻做左一對幾好嘅朋友，我亦都當左佢係我嘅傾訴對象~

代價當然就係教佢功課同用我嘅方式講解多次上堂教嘅野比佢聽。

我好少會將自己嘅野同其他人講，就算朋友問起都好我都係用笑嚟帶過。

而小櫻可以話係第一個令到我主動同佢講出自己嘅心事同煩惱，佢更加成日都睇得出我煩緊咩。

今個星期尾我除左出去練波之外我大部份時間都留左係屋企休息，放完個暑期成個人散哂，太耐無一個星期返足五日學搞到個人有啲唔慣。





經過完小櫻嘅說教同我自己嘅反思，我都開始無乜點去諗關於女神嘅野，但係往往你想忘記或者當件事丟淡左之後，總係會有啲意想不到嘅野發生。

好快又隔左一個星期到左星期三，我依然好早就到左學校，我仲有多餘嘅時間陪小櫻落去樓下食枝煙。

唔知由幾時開始依到已經變左我地兩個嘅幽會地方~

我地傾左一陣計上到課室陳老師岩岩好準備開始上堂，我返埋位坐佢，我女神再一次好準時係老師講第一句野就開門入嚟。

而咁岩嘅係今日我隔離無人坐，我女神行到埋嚟坐低，今次佢唔再係黑哂面未訓醒嘅樣，佢今次微笑住咁同我講:





"喂阿冬早晨呀~"

".....早晨呀......"

"做咩咁呆呀?上星期你精神好多架喎!"

"ah....係咩......."

"你咁嘅話我調位同其他人座架啦!"





"咁又唔好....只不過...."

"不過啲咩呀，講嚟聽下啦。"

"我想問妳呢...有無當我係朋友?"

佢再一次對住我微笑，佢兩粒酒窩我依世都唔會忘記:

"如果我唔當你係朋友嘅話，我就唔會主動同你講咁多野啦死蠢!"