我要係20歲之前，將女神變做女朋友: 第十節:傾訴

第二日我依然帶住睇唔透嘅感覺返學，我已經當左佢係朋友咁佢當我係咩…

我返到課室佢依然未到，睇嚟遲到係佢嘅習慣，今日上堂嘅課室雖然唔同，但我照舊坐返係啲角落位。

Jaffy返到嚟見我咁寂寞就坐左係我隔離:

“早晨呀，你日日都咁準時架喎。”

“我平時都係慣左早到，廢事要人等嘛，返學返早啲好，可能miss有啲緊要野講都可以聽到。”



“都係嘅。”

眼見其他同學都返得七七八八，老師亦提早開始上堂唔等遲到啲同學。

大約上左堂十分鐘左右，我女神終於開門入嚟，佢個樣都係同尋日朝早一樣未訓醒黑黑地面咁樣。

佢坐左係我地組另一個組員隔離，之後上堂我都無乜點留意佢。

直到放飯Jaffy今日約左其他班嘅同學，而我聽到我女神亦都約左其他人食飯，我同另外兩個組員唔太熟所以同佢地講分開食。



我出到課室門口見到架lift出面企滿哂人我就決定行樓梯落去，我行左幾級樓梯就比人叫住左:

“阿冬妳有無約人食lunch呀?"

我望上去原來係小櫻岩岩係女廁門口叫我:

"無呀，Jaffy佢約左人食飯我同另外嗰兩個組員又唔太熟所以諗住自己食。"

"我地無人約啊，一唔一齊食呀?"



"無所謂啊~"

我地落到去學校門口小櫻拉左我去學校前面棟樓嘅後面，有一個細細地嘅休息地方比啲老人家散下步。

佢拉我去到一張長櫈到就坐低到，佢係個袋拎左包煙出嚟問我:

"要唔要整返枝呀?"

"我唔食煙架，妳自己食啦。"

"係喎都未問你介唔介意我食煙添~"

"介意都無用啦，妳都食緊囉。"

"對唔住囉，食煙可以幫我減下壓，上堂啲野深得濟搞到我有啲壓力~"



"我覺得還好啦，妳唔識唔明可以問下我嘅。"

"嗱你講架到時唔好厭我煩啊!!!"

我地傾多左幾句，等到佢食完枝煙就去左食飯，佢帶左我去食一間台灣野嘅餐廳，我地叫完野食之後就繼續傾返頭先啲野:

"係喎點解你唔同另一個女仔一齊食飯嘅?我尋日見你地都幾好傾。"

"吓咁樣都比你睇到?"

"係呀，我仲見到你望實人地訓覺個樣添~"

“痴線邊到有呀!”



“你講咩都無用架啦，我全部都睇到哂，一睇就知你鐘意人啦。”

比小櫻一下就講中哂，估唔到佢會咁留意我，佢會唔會覺得我好痴漢feel呢.......

"其實我覺得好正常呀，男仔鐘意一個女仔緊係會好留意佢嘅一舉一動，佢個樣又咁靚，比著我係男仔都會咁樣。"

"我仲諗住你會覺得我好變態添，係呀我鐘意佢但我同佢連朋友都做唔成......."

我將尋日女神講過嘅野完整複述一次比小櫻聽，佢好認真聽我講成件事，比到一種可以同佢傾訴嘅感覺:

"我覺得只係你諗多左啫，同埋我覺得佢只係講緊笑，你唔洗擺係心喎。"

"我都分唔到佢係講緊笑定真係咁諗，我連問佢嘅機會都無......"

"唔洗將件事諗得咁壞喎，尋日你都有同佢有講有笑嘅時候，證明左佢對你都有啲興趣，唔好諗咁多啦食野先啦!!!"



佢將佢啲餸夾到係我碟飯到示意我快啲試下。

可能真係小櫻所講係我自己真係諗得太多， 總會有機會問清楚佢，依家諗咁多都無用~