我要係20歲之前，將女神變做女朋友: 第八節:距離

我諗都諗唔到佢同我講左句:

“我都有玩喎，咁岩前排4周年我玩返。”

“係咩……”

我都估唔到佢無啦啦咁講，搞到我都唔識應佢……

佢一邊望住我玩一邊開緊隻game





“哇你連依隻都有呀，睇嚟你玩左好耐喎~”

“唔係呀，我都係咁岩4周年先玩返。”

就係因為一隻手機game令到我地打開左話題，直頭落堂嗰一刻我地都仲討論緊隻game。

放飯嗰時Jaffy再一次問我地一唔一齊食，我女神第一個話約左人就走左，為左唔令Jaffy尷尬我第二個話一齊食囉，其餘兩個組員都點頭話無問題。

由我第一刻同Jaffy傾計我就已經覺得佢係一個好有領導能力嘅人，因為我本身比較內向怕羞，而佢同我正正相反所以我都好羨慕佢成日敢講敢做好多野。





今次lunch我地夾埋左其他組嘅兩個女仔一齊食，佢地兩個因為之前嘅小遊戲而令到我地有交流。

加上佢兩個係一個禮拜裡面除左day off都同我一齊上堂嘅同學，所以我同佢地都比較熟。

食飯嗰時大家都多左交流，唔似岩岩開始各有各食同玩手機。

隔離組其中一個女仔阿山就問我地幾多歲:【因為我地依到係咩年齡層都讀得，唔一定要dse之後，我就係其中一個例外】

Jaffy話自己25歲同組嘅其餘兩個分別18同23，而阿山就係21歲另一位叫小櫻嘅22歲，而我就係20歲。





除左Jaffy之外其他人都還算後生，Jaffy仲講佢出左嚟做野三，四年，因為想從事教育依方面所以簡左幼教依一科。

原來Jaffy唔止年齡上大過我地，佢更加已經出過嚟社會做過下野，所以比我嘅感覺先咁成熟，但老實講佢個樣依然似18至20歲左右。

食完lunch之後我地返到課室準備上第二堂，我地返到嚟嘅時候我女神已經伏左係張枱訓緊覺。

我靜靜地拉開張櫈廢事嘈醒佢，點知一坐低佢就起左身。

“sorry呀係唔係嘈醒左妳?”

佢擰擰頭之後搓一搓隻手又訓翻低，因為部冷氣成日吹住我地依邊，我亦都意識到佢係凍醒左。

我係背囊攞左件外套出嚟拍一拍佢示意借件外套比佢。

“唔該哂你”





佢講完就著起左我件外套又再次訓翻低，佢訓嘅時候咁岩望住我依邊，我望住佢個樣望到入哂神，心裡面諗如果我係20歲之前追到佢咁我一世都無遺憾啦。