誰搬走了我們的半塊芝士: [第二章]第七十集：會告訴你真相的,只有兩種人

一張開眼，第一眼見到的，是一大片木製的天花板，我坐起來，摸一摸自已的臉，那副在溥儀四的價值八千元的眼鏡依然在臉上，好讓我可以看清楚自己正身處在什麼地方。

一眼看看周圍，我正在一個一足一千呎的空間裡，這裡只而兩種東西，一是大大小小的酒櫃，二就是被我所坐著，全倉共有幾十個的啤酒桶。

我拿出褲袋裡的IPhone，已經是十一月十日的早上十時，闖入3K黨總部是十一月九號夜晚的事，看來我又不知不覺訓了超過二十四小時。已經是第二次睡得這麼久，發生這樣的事只有兩個可能性，有可能因為時差問題以致我內分泌出現問題，所以訓極都唔夠，亦有可能是我原來身懷古怪絕症。

答案我話你知，肯定係第一個！我同你講一個前幾日先玩完3P既人有絕症，你信唔信啊！？緊係無可能啦！

但其實都唔係無可能既，不過我話無就無啦，你唔好同我拗喇，收皮啦。





如果你問我，點解而家會係個貨倉入面，我可以話你知，應該係老酒保所做既好事。不過確實既情況係點我唔太清楚，但我可以同你講返，果一槍之後究竟發生左乜野事。


「砰！」

當時，隨著一記的槍聲，首領話都未說完，本該繼續說話的頭就消失了。

其實說是消失了好像有點不貼切，正確點說，他不是成個頭無鳩左，其實重剩返個下巴。





在爆頭的一瞬間，我身上並沒有沾上半滴血，但兩秒後我被他傷口位置所噴出的血搞到成身都係。

究竟邊撚個打爆佢個頭！？唔通係樓梯果邊有人上左黎開槍！？一望過去，鬼影都無隻。

那麼是遠方的狙擊手所下的毒手嗎？我左顧右盼，觀察每一個扁平的窗……都是完好無缺的……連半個洞都沒有。

既然兩個最大的可能性都不是，那是誰殺了首領？老酒保？被我綁住，正一臉驚慌的polo恤白鬼？還是在一角躺著，被五花大綁的盧卡斯？

望著幾個嫌疑犯，我皺一皺眉，看來案情並不是這麼單純……





不過，我都唔知個死白鬼有無病，所以首先要趕快抹一抹身上的血。我一邊脫下外套，一邊思考一件事，就是在這間房間有誰持有著足以打爆人頭的強大火力？

實在怎都想不透，難道那白鬼的頭上早已裝著炸彈，只要講錯野就會爆炸？這種情節我在電影見過不少。

為了脫下外套，我必須先放下手上的短獵槍……望一望才發現，槍管正冒著硝煙……

點解會咁樣？原來兇手就係我？我愕然，望一望支槍，再望一望那具無頭屍……


屌你老母！！我殺左人！？


我殺鳩左3K黨既首領！？

點解會咁嫁！？我完全無殺佢既意思嫁喎！！點解佢會無啦啦死左嫁！？係唔係支槍會無啦啦走火！？





屌！我唔記得喇！！但我真係無心殺佢嫁！！

我抱著頭，正苦惱著為什麼會發生這種意外的時候。

「喂，越南人，在事情鬧大之前要走了。（英語）」是老酒保的聲音。

回頭望過來，發現他已經像托著死屍一樣，用手臂固定著盧卡斯一手一腳，四平八穩地站著，我見到盧卡斯口腫面腫，發紫的左前臂斷到好似多左個關節咁，而且毫無生氣，都唔知會唔駁唔駁得返。

正當我望得呆了的時候，老酒保咬著煙叮囑我：

「記得帶走你的外套，我們現在就要出發離開。（英語）」

望著首領的無頭屍，我面都青埋，全身都震哂，不知不覺地吐出一句：「But……」





「But?But什麼？你的目的都達成了，還想留在這裡做什麼？想跟屍體繼續傾計嗎？（英語）」

我搖搖頭，拿起外套與短獵槍還有吧枱上的雙槍，就趕緊跟在老酒保後面，瞬速離開3K黨的總部大屋。

回頭望一望大屋，我真的沒想到今次的事件會以這個方式完結……


上到傻豹號，我的記憶就開始模糊，只記得當時我和盧卡斯被丟到後座，由老酒保駕車載走我們。

「我欠你們這些越南人的，一生都還不完。（英語）」

這是我記憶中聽到老酒保所說的最後一句說話，之後發生了什麼事，我們被載到哪裡去，我則連半點印象都沒有。

失去意識期間，我沒有做夢，醒來的時候，已經直接回到現實。然後，一起來我就發現自己的身處在一間貨倉裡，正躺在幾大桶啤酒上面，這就是我所知道的全部。






係我出返去依個貨倉之前，有件事我想同你地講。

你知唔知道？做人只要講左第一個大話，好多野都返唔到轉頭，如果一日唔認衰，你就注定要永遠背負著更多既謊言走落去。

其實來到現在這個時間，我已經受夠了，唔想為左一次吹牛吹大左搞到要吹更多既牛彌補，咁做人會好辛苦，所以我決定向你地坦白。

我以前確實係黑社會，不過事實上大部份時間我都係跟緊雄哥，而我只係佢五條頭馬其中一條。我出冊後兩年，雄哥都未做到坐館就已經比人碌斷腳坐監，見到佢既下場，我就開始行返正行，係M記搵左份西工做住先，做下做下，不知不覺就做鳩到而家。

我最多只可以話行過古惑，但講真，旺角水房六八九幾時輪到我做啊！？何況做得坐館既話，我重洗做M記！？醒D啦！戇鳩仔！人講你就真係信啊？
而我坐監既原因，的確係因為殺左人，但因為當時有個幾犀利既律師幫我打依場官司，所以罪狀唔係蓄意謀殺，而係誤殺。

我在香港的個人身份紀錄上，的確是一個殺過人，坐過監的惡人，不過在這個時空的真實歷史上，殺果個人既唔係我，而係雄哥。

我當時只係捱義氣幫佢頂罪，所以雄哥先會幫我請個好律師。





所以嚴格黎講，直到琴晚開槍既一瞬間為止，我都係一個清清白白，無殺過人既良好人類。

我之前都講過，而家依個世界，都係由經我把口而誕生，作為聽眾，你無選擇既餘地，我講乜，你就要信乜，其實真係非常被動。

但我以人格尊嚴擔保，除左以上果堆野，你地睇到既佔九成以上都係真正既事實。

所以你地要原諒我果份不足一成既錯誤。


其實阿權無死。


佢唔係復活左，定係變成左僵屍，又或者係共濟會的最終頭目，或是一個超能力者。

事實上，我根本無殺到佢。

當日在骨場門口，我所遇到的阿權臉上並無失落之情，反之，他當時正春光滿面。

對於這個偶遇，他非常驚喜，在我提及廠妹之事前，已經被拉到附近一間小菜館食宵夜。

當時我心諗：

「好啊，食飽先都好，你又可以做隻飽鬼，我又可以更加有力咁扑鳩死你，而且夜d行動對我更有利，WinWin雙贏，緊係好啦。」

於是我們去到目標的小菜館，一坐低，阿權居然話今餐佢請，重叫到成枱都係餸，唔知佢係想用地溝油毒死我，定係作為生物的直覺告訴他等等要死，所以連忙食返餐好。

望著成枱餸，香噴噴，理得佢地溝油定萬年油，反正咁多年都食唔少，唔鳩理鳥！

係啊！無錯啊！其實我們吃地溝油真的已經吃了好多年，只是一直不知道罷了。大陸佬為賺錢可以去到好盡，因為大陸係一個有錢就可以為所欲為既地方，只要有錢就可以做皇帝。

所以無論去到邊，大陸佬都總係擺起一副皇帝款，雖然會痞係條街，雖然會隨地吐痰屙屎，雖然會亂掉垃圾，雖然依然會搶奶粉……但他們的自我感覺上都是皇帝，其實都岩既，做得皇帝既，根本就唔鳩洗理你地d賤民既感受。

大陸有地溝油，腎石奶粉，頭髮豉油，共產黨等等的人禍。

但我們香港也不輸蝕！吸血鬼地產商同業主，落盡全力官商勾結既賣港政府，不屈不撓比豬更蠢的愚民，其實香港都好有自己既特色嫁！屌你老母！

其實如果唔係班吸血鬼一日到黑乜都唔洗做，繞埋雙手䟴䟴腳加租，賣港政府又官商勾結，笑騎騎唔做野，加上一大班度縮數賺到盡既杏加橙老細，同埋班殺到埋身都重當無事發生，日日準時反工，唔準時放工，返屋企開開心心睇TVB，戇鳩鳩既愚民……

香港人其實真係未必洗食地溝油嫁。

講撚到尾咪又係犯鳩賤！


食飯時，阿權清醒的時候，我們的對話離不開都是性器官，性器官與性器官，扑野，叫雞，揼骨，仁K……

我想，阿權的身邊，大半生都環繞著這些東西，多年來，他無悔無怨，還樂在其中，但我卻不禁為他而感到悲哀，一個人的一生就只有射精與M記，我都唔知應唔應該將d咁既核突野稱作人生。

不過想一想，我的人生，又何嘗不是這樣？


果晚吃完一大堆地溝油小炒，我同阿權已經喝了數不清那麼多支大青島，雖然他已經醉到成坺屎咁，但我酒醉重有三分醒，所以殺死阿權的計劃依然繼續進行。

阿權醉酒過後，雖然滿咀都繼續是性器官，不過，卻比平時多了一份感性，這讓他在我面前漏口講出與小紅扑野扑到要換床單的事，闖了大禍，今次卻救了自己一命。

我用他銀包裡的錢找數後，便拖行這個爛醉如泥的大男人行走指定的路線，去到我早就準備好的那間單位。

沿途他一直胡言亂語，又問73號小巨肺去左邊，點解咁耐都未黎，忽然又唱海闊天空，為免惹人注目，我將褲袋袋住果幾舊呻過鼻涕既廁紙一野塞哂入佢個口，好讓他安靜一下。

一路上都無遇上任何人，我們就這樣順利到達這個經我準備了多年的單位。

在事實上，我沒有一入屋就用壘球棍打爆佢個頭，因為我當然正非常吃力地拉佢入屋，除非有兩個我，否則我根本不可能做得到這種事。

見佢醉到成條死屍咁撚樣，我將他掉到地面早已準備好的膠布上，然後洗了個臉，涼一陣冷氣，才開電視，拿起壘球棍，對準佢個頭，度好位準備一棍毆落去。

但睇到佢訓到好似死左咁，乜野反應都好，感覺上就好似姦屍一樣（我必須澄清依個只係比喻，我完全無雞姦佢既意思），就算毆落去都無乜癮。

玩得依樣野，就緊係要對方都比反應先過癮嫁啦！

反正電視開得好大聲，我唔怕佢叫救命或者發神經，於是就將他口入面的廁紙取走，好讓他能說句話，講句遺言我才毆落去。

我拍拍他的臉，單刀直入地問：

「喂，阿權，你係唔係屌過小紅啊？」

我已準備好，當他一答：

「啊……？係啊，波叔，小紅個西又窄又多水……」就一棍毆爆佢個頭。

然後他張開眼，戇鳩鳩地望住天花板，望望我，再說：

「波叔，你知唔知啊，我做左咁耐人，你對我就最撚好嫁喇！我話你聽，你對我，重好鳩過我老豆對我啊！」

「其實我記得嫁，我之前漏口同你講錯野，話我屌過阿嫂啊嘛！你知唔知啊？我之後驚撚左成半年，驚你會隊冧我啊？但我諗過，如果你真係要隊冧我既話……我都無辦法……會認命嫁喇……鬼叫自己仆街衰咸濕……」

「但你大人有大量，之後居然重對我愈黎愈好……我真係鬆一口氣之餘，重好撚感動啊……所以……之後阿嫂搵鳩過我好多次，我都無So佢……」

「因為我真係好撚對你唔住啊！」

望住他流到成面眼淚，口水鼻涕流到落件衫，我沉默地站起來，走到一張小椅子上，用了整整一小時思考自己的人生。

期間阿權又講幾次對唔住，然後又憑空屌鳩D M記兼職仔，唱多兩首歌……又開始繼續訓。

我就一直繼續坐，無焦點地望著冷氣機。剛剛阿權的話是酒醉下所說的真心話，還是根本清醒，所有都是求存所說的謊言？做人做左咁多年，真醉定扮醉，我一清二楚。

其實件事都過左咁耐，阿權咁耐以黎都好內疚，何況小紅多年都唔止同阿權做錯事……或者溝得依條女，我應該早就預左會遇到依d事……

最後我問自己，做人做左人咁耐，有幾多人好似阿權咁，係真心尊敬我？

應該就只有阿權一個……

講真，我又點可以殺死世上唯一一個真心尊敬我既人？


這就是我的答案。


就這樣，我帶走阿權離開那本該是屠場的單位，將他丟到一間賓館後，已經天光了，在附近吃過港式早餐後，我就回香港。

雖然殺阿權的計劃取消，但因為我已經買鳩左機票，而且做大事的理想還是沒有變，所以坐飛機到芝加哥的魚柳包之旅還是必須繼續進行。


要問我為什麼要講出真相的話，我只可以說，一個大話，確可以令我威一世，但現在真的殺了人，加上老酒保的故事，讓我知道，自己根本從來無威過，死頂落去係自己攞黎柒。

過去，我同所有男人一樣，衰係面子上，為左保住自己既型像，我將自己愈吹愈大，最後收唔到科，好多野都要死衝，最後我已經趕唔上吹出黎既自己既步伐，我好清楚，繼續衝落去，就只有一個結局等緊我，就係死……

所以，與其將功積建立在從不屬於自己的謊言之上，去扮演一個自己作出黎既角色，不如腳踏實地做返自己，反而更有存在的感覺。


我有信心，而家既陳錦波更有能力幹一番大事！