Ashley Madison 一個婚後偷腥男人的自白 (有甜): （七）
「Hi！你玩AM玩咗幾耐啊？」
「幾個禮拜左右啦，你呢？」
「耐你少少，幾個月左右。你有冇見過依度識到嘅男人？」
「見就未，啱傾嘅就有幾個。」
「呢度男多女少，你可以慢慢揀到啱為止先出嚟見。」
「係。上到黎我先知原來咁多男人出緊軌或者想出軌。」
「哪有貓兒不好腥？」
「其實點解啲男人結咗婚都仲想出嚟玩？」
這一刻我也不知道怎樣回覆她。我想了又想，男人出來滾的而且確是一件見怪不怪的事情。但是若果你要我仔細地解釋為什麼男人會這樣做，我又真的說不來。這就像是所有人都知道一加一等於二，但解釋箇中緣由則是一個博士級的問題。
「好多原因㗎喎⋯有啲貪玩貪新鮮，有啲人想證明自己重有魅力，有啲同老婆唔啱，有啲想逃避現實生活中嘅壓力⋯」我嘗試繼續用一些山是石頭海是水阿媽是女人的道理來解釋這件事。
「咁你自己呢？」
「我同我老婆性生活唔協調，我都係想解決吓我生理上需要啫。」
「你同結咗婚之後先發現？」
「都唔算係，我之前天真以為自己可以忍到啫。係呢，你結咗婚未？」
「下個月就十四年。」
「嘩！佢開始對你冷淡？」
「佢出邊有第二個。」
「有咗幾耐？」
「我年零前發現嘅，我估一齊咗差唔多兩年。」
「佢知唔知你知？」
「知。我發現咗之後同佢攤咗一次牌，佢誓神劈願話唔會再見個女人，之後唔夠三個月咪又比我發現佢哋兩個仲有聯絡。」
「你仲忍佢？」
「離婚咪仲衰。我唔想我啲仔女成長係一個單親家庭。總之佢唔好比個女人搞到我個屋企，俾足家用同做足佢做爸爸嘅本份，其他嘢我都可以隻眼開隻眼閉。有啲乜都等啲小朋友讀完書先算。」
「咁你上嚟AM其實係咪有少少出於要報復嘅原因呢？」
「都有啲嘅，但係我真係想理解吓係乜嘢原因令人出軌。」
「開枝散葉係男人嘅天性，所以你要一個男人專一其實係go against佢幾千年遺傳落嚟嘅instinct。」
「我好多friend啲老公都好專一㗎喎。」
「咁人始終都有啲唔同嘅。有啲花心有啲專一，有啲鍾意搞基有啲鍾意女人。其實你有冇諗過如果俾你喺度搵到一個同你好啱好夾嘅有婦之夫，你又會點做呢？」我感覺到如果我再不叉開話題，我只會和這個人妻繼續無限loop。
「我都唔知，我之前都未試過。」
「凡事總有第一次嘅。」
「呢啲嘢試咗冇得返轉頭㗎喎⋯⋯」
「你可以慢慢一步一步來，你連任何一個人都未見過你又點知其實AM能唔能夠俾到你想要嘅嘢呢？」
「我一定唔會第一次出嚟就同個男人上牀囉！」
「我諗你誤會咗，我嘅意思係你可以約幾個係AM上傾得埋嘅男人出嚟飲杯咖啡見個面。其實唔係個個男人都淨係識用下半身諗嘢嘅，大家見完合眼緣先諗有冇需要再進一步接觸啦。」
「但係好似好尷尬咁喎⋯⋯同埋如果個男人見到之後先覺得我唔夠索咁我咪好樣衰？」
「你可以互send相之後先決定見唔見㗎嘛。」
「唔制！咁唔安全！同埋依家咁多P圖app，有相都未必似真人啦！」
「你要玩就預咗有風險同有意想不到嘅事情會發生㗎啦。偷情叫得做偷就係因為依段情緣本來唔係屬於你嘅，而你要去偷就代表你要付出，但唔一定會得到。同埋就算你偷到之後都只可以成為一個秘密。你不如諗清楚你係咪想玩先啦。」
人妻讀完我以上的短訊之後沒有立即回覆，我也當沒了回事。過了幾天後，她再次找我閒聊。
「我終於約咗其中一個AM男人出嚟。」
「見成點啊？」
「佢幾nice但係我冇乜feel。」
「一個唔啱咪試第二個囉，起碼你依家知道唔使再嘥時間係依個男人度。」
「我同佢用手機傾都OK，但係面對面個陣個感覺完全唔同，勁多dead air勁尷尬。」
「之所以你要見吓真人先知啱唔啱。」
「你講到好似好明白成件事咁，你一定用AM食咗好多囡，係咪？」
「你同我出嚟飲杯咖啡食件西餅我咪話你知囉，嘻嘻！」打蛇隨棍上係溝女嘅起手式。
「我唔會為咗聽你啲艷史就中計嘅，唔制！」
「咁如果我好有誠意約你星期四下午二點半去XX咖啡座試吓佢地既手磨咖啡同home made cheese cake，你又會否嘗面呢？」
「你點有誠意法先？」
「我啱啱已經訂咗位。」
翌日，我和秘書説我會在星期四下午見客，可能會四丶五點才回到辦公室。XX咖啡室在上環某橫街小巷，是一個靜謐非常的地點，午飯時間後基本上沒什麼人來往。除此之外那咖啡室的私隱度高，是個適合談心的好地方。我早了五分鐘到了附近，便給她發個短訊。
「我應該會早啲到，你慢慢嚟，我攞枱先。」
「我已經到咗，我著深藍色連身裙。」
其實她不用告訴我她穿什麼我也不會弄錯，因為整個咖啡室內除了侍應就只有她一個人。我進了大門後對她揮一揮手便在她面前坐下。勤快的侍應立即過來幫我們下單後便走開到咖啡室的另一角。
「等咗好耐？」
「冇啊，一陣啫。」
「其實我哋傾咗咁耐我都未知你叫咩名？」
「Carol，你呢？」
「阿俊。」
Dead Air。她的話不多。很多人在這情況會會忍不住拼命找話題來打破沈默，我卻選擇微笑地打量著她。
「你個樣同我想像之中唔同。」我望了她一會後對她說。
「冇你想像之中咁靚？」
「唔係，我相像之中你係長頭髮同陰聲細氣。冇諗過你係短頭髮女強人look。」
「啫係覺得我男人婆啦。」
「如果吳君如係一個男人婆，咁你會似何韻詩多啲。」
Carol是屬於比較慢熱的人。但是在我循循善誘之下，她的話匡子也慢慢地打開。在一般人眼中，她是個人生勝利組的榜樣，她大學畢業之後沒多久便下嫁於她丈夫，豐衣足食生活擔憂，膝下有兩名子女，每天的生活都基本上圍繞着相夫教子。但這也是她婚姻出現問題的由來。雖然她和丈夫都住在同一屋簷下，但大家的生活卻大相逕庭。沒有什麼工作經驗的她不太理解丈夫工作上和辦公室的政治問題，而她老公也不太理會家中瑣事和子女的問題，令她覺得自己像個單親媽媽一樣。其實，家庭主婦都是一份工作，還要是一份吃力不討好和年終無休的苦工。
「你覺唔覺你自己好迷惘？」在聽完了她的背景之後我決定單刀直入問她。
「咩意思啊？」她不解地回應著。
「我覺得你將你自己的的身和心都放係你老公同仔女之後，無錯你咁做係好偉大，但係久而久之你連你自己都迷失咗。你仲記唔記得你上一次無憂無慮去做自己鐘意做嘅事係幾時？」
她無語。
「我明白你覺得老公對你冷淡，仔女不夠孝順，但依個世界唯一會永遠對你好的只有你自己。你需要嘅唔係AM或者一個情夫，而係一個愛你自己的自己。」
一滴眼淚已經忍不住從她的眼眶中流下臉頰。我沒有繼續說下去，只有默默地把一張紙巾遞上。到了結賬離開時我倆也再沒說多一句話。 我們一起走出了咖啡室到街上。臨別時，我輕擁了她一下，然後在她額上輕輕一吻。幸好她並沒有推開我和叫非禮。
「Nice meeting you, Carol. 你自己保重。」
「多謝你。」
說畢，我們互相莞爾一笑後便各散東西。 那天之後，我們都會久不久在微信上打個招呼閒聊幾句，但卻沒有再次見面。我只希望她能夠找回她自己。
Good luck, Carol.