[最新有甜][鬥智] 畢業搵唔到工，我誤打誤撞咁加入左跨國毒品集團做trainee: 四，資本主義社會的上流和下游（下）

我們戴上頭套，各自的走回自己的Van仔，大約一個小時的車程後，我們回到最初的起點，淺水灣。
 
「我啱啱諗過。」我說。
「諗咩？」軒問。
「計劃囉！唔通今晚食咩咩？」
「咁你諗到啲咩？」航問。
 
「首先我哋目標要滿足嘅需求係邊啲人？上流社會？低下階層？」
 
「上流社會先可以比得起錢，但係我哋同上流社會完全係脫節。」軒分析。


 
「無錯，但係如果我哋賣比深水埗嘅道友，佢哋根本唔會有能力可以買超過1至2克嘅可卡因。一個月綜援，計埋其他補貼先得個三千幾蚊，飯都唔夠食啦，邊度有錢可以買啲高質嘅可卡因？我當每一個人買一克，要有1000個人肯買，我唔肯定全個深水埗有冇咁多人食Cocaine...」
 
「同埋我哋唔可以自己落手賣。」航接着說，「我哋要搵到下線可以幫我地聯絡到1000個道友，然後仲要有能力賣晒比佢哋，點會有可能...除非...」
 
對，看來他們也已經長出基本的智慧了。
 
「除非我哋用上次嘅方法，賣比一個人，然後叫佢再賣返俾我哋！」他興奮地說。
 
屌，收返。


 
「只有道友先可以認識到咁多道友。」我說。
 
「道友係唔可信。」小孟說，「你將白粉交俾佢哋，佢哋容乜易自己食晒？唔好咁天真啦。道友冇一個係好人。」
 
她的確是聰明的人，了解人的習性，就好像今天一樣，預先阻止了一場慘劇。
 
「你激動做咩啫？」我問，「唉。咩都諗唔到...」
 
「屌，即係廢啦，我返Hall打牌算。」軒沒趣地說。


 
打牌...道友明！
 
「你隻麻雀腳，道友明啊。」我興奮地說。
「佢一個人點樣要曬120萬嘅貨啊，仲有，我哋唔可以直接同道友交易，你唔記得咗啦？」
 
「唔係，但係佢識好多道友。」
 
對，我也跟他打過幾次牌，他的貨源我不清楚，但我聽他自己說，他經常去深水埗等地留連取貨，在該區有着不少連繫。
 
「係姐，但係你叫佢做拆家，佢一定唔制。一個人拎住一公斤毒品，喺深水埗，埋嚟睇埋嚟揀咁樣叫呀？」
 
的確，他不是甚麼社團，叫他孤身一人承擔所有風險，我們就在背後坐享其成，這樣他一定不會願意。
 
「激氣，又行唔通。」我氣餒地說。


 
「咁又未必。」航說，「佢有嘅係人際網絡，有錢收嘅話佢自然就願意幫我地聯絡。佢唔願意嘅係直接拎毒品去做買賣，兩者係冇抵觸。」
 
他有道理，但雖然兩者並無抵觸，但...
 
「但咁樣我哋始終解決唔到交易嘅問題。就算有客源，都冇用，有乜嘢人會願意幫我地交易毒品？我哋完全冇社團嘅聯繫。」
 
「或者我可以嘗試聯繫一啲相熟嘅社團。」小孟說，「不過咁樣我哋嘅利潤就會減少。」
 
「要利潤最大化，Profit maximization...」我說，「要開源節流，減低成本。」
 
「最有效嘅方法係...義工！」我說。
 
「大佬，我有啲混淆，啱啱先傾緊連道友明都唔會咁笨柒去幫我地賣毒品，而家仲話諗住請義工？有咩可能呀？」航完全不明白我的想法。
 


「未係囉，唔通叫紅十字會、青年服務團，幫我地去深水埗好似賣旗咁樣賣毒品啊？」軒說。
 
「就係咁樣。我哋以前喺宿舍未識中大青年服務團個團長嘅？我今晚就搵去幫手，我會開出一個佢冇辦法拒絕嘅條件。」我說。
 
「軒，你負責聯絡道友明。」
「小孟，包毒品就交比你。」
「航，你負責休息一下。」
 
「你地真係決定要咁做？」小孟說。
「當然，今次我哋一定贏！」我興奮地說，小孟卻擺出一些沒眼看的表情，我看她一定是嫉妒我的聰門才智。算了，不管她，沒有她動腦，我們也不會輸。
 我約了青年服務團團長阿豪晚上八時在中大山頂的新亞Canteen等。