[最新有甜][鬥智] 畢業搵唔到工，我誤打誤撞咁加入左跨國毒品集團做trainee: 三，香港不夜城的暴走（中）

正當我想走過去覆焯的時候，我發現我已經引起其他警察的注意。為免節外生枝，還是算了。哼，算你們走運，不是我不敢打你們，只是我今天沒有心情！
 
航和軒亦同時從兩間酒吧走出來。
 
「喂，啲貨點啊。」我問。
「賣唔到啊屌，佢哋全部以為我係Waiter，叫我比可樂佢哋。」軒憤怒地說。
「走啦我哋都係，此地不宜久留。啱啱差啲賴嘢，好彩我幫你地頂左。」我說。
 
我們一行三人馬上離開充滿警察的諾士佛台。
「做乜撚嘢咁多差佬嘅？」軒大惑不解。


「咁警察可能都有性需要呢？」航說。
「九唔搭八。」

「咁我哋而家去邊啊？」
「等我諗下...」
 
對，認真地想想。只要我認真起來，一定有解決的方法。
 
「係喎。我知啦。」我靈機一動，突破了盲點，說：「佢未話，除咗唔可以賣比自己之外，冇其他規矩嘅？」
 


「咁所以我哋可以...」航似乎也想通了。
「點啊？講啦！」軒不耐煩的說。
 
「只要我賣比你，你賣比航，航再賣返俾我就得。點解啱啱諗唔到呢件事，激氣！」
 
「啊，雖然你講得啱，但係有一個問題。」航說，「就係我唔使再賣返比你啦。」
 
他拿出銀包，點算着$12,000。
「頭先我賣咗啲毒品啦。」
「下？你點做到㗎？」我大驚。


「咩啊，你喺天星小輪教我嘅。『你哋食唔食可卡因啊？』，我求其揀左一台男女問，佢哋就好爽快咁樣俾咗錢我。」航說。
 
「...」我沉默。
「...」軒也沉默。
 
我們很快的跑離酒吧街，在中途隨便倒了那些可卡因，然後在幾部不同的提款機提了$24000，再加上航剛才賺的錢，$36000，剛剛好。
 
途中我們看見不少剛才在40樓見到的競爭對方被拉倒按在地上。
「彭！彭！彭」很多不同槍聲此起彼落的散落在城市的四周。
「今晚啲差佬癲曬！癲曬！逼害良好市民。」航一邊跑一邊叫。
 
地鐵去到中環站，我們跑過長廊，在香港站的出口跑入IFC，在升降機口發現幾乎沒有人在等。
 
「又會冇人...」
「應該冇咁快，我哋只係用咗大約一個鐘。」我說，「當然，又或者係佢哋已經全部搞掂曬。」


 
回到不存在的40樓，只有幾個人和那些戴面具的幹部在。看來我們趕上了！
 
「我哋搞掂啦！」我秀出手上的$36000。
「哦？好快手喎。恭喜你地，分別係第五第六同第七位。」灰鷺不知是欣賞還是諷刺的說。
 
「其實根本就唔使賣比出面嘅人，只要慢慢走去樓下撳錢，然後同其他參賽者交換就可以。」我說。
 
灰鷺看看手錶，說：「用咗大約一個小時就諗到，都唔算太過弱智嘅。」
 
「唔係，我諗到嘅唔止係咁。」我憤怒地說。
「喂，你做咩啊！」航很害怕，就連平常很衝動的軒也不明白我為什麼生氣。
 
「測試只係幌子。你根本唔係想要我哋手頭上呢幾萬蚊。如果唔係，街上面點會有咁多差佬 ？」我分析着。
 


「我哋啱啱去咗諾士佛台，警察大約係平時嘅五倍。如果我冇推測錯嘅話，蘭桂坊既警力應該會係平時嘅二十倍以上。」
 
「我本來都覺得奇怪，點解咁多地方唔揀，偏偏要係IFC？培育毒品精英嘅地方，唔驚俾人發現一網打盡？MT Program... 200個人？香港寬頻都冇請咁多啦！」
 
不過香港寬頻都不請我。
 
「原因好簡單，因為呢度好近蘭桂坊。按照你訂立嘅規矩，兜售嘅目標係無限制。正常嘅參加者都會覺得，如果要快速完成任務，一定係要去蘭桂坊，由呢度跑過去15分鐘都唔使，好運嘅話唔需要一個鐘就可以完成任務。」
 
「如果唔係逼唔到入電梯，我諗我哋三個已經犧牲左喺蘭桂坊嘅大屠殺入面。因為你哋一早就已經放風聲，蘭桂坊今晚會有大規模嘅毒品流入，我唔知你哋用咩方法，不過我諗以你哋嘅規模同埋計算，警局入面應該都有好多你哋嘅人。」
 
「警察戒嚴，設立捕鼠器，而你哋就放我地入去做老鼠。如無意外，聽朝新聞嘅頭條就係警方搗破大規模、集團式經營毒品買賣。」
 
至於你們這樣做的原因...
 
「原因只有一個。你哋應該有另外一單嘅交易會喺今晚進行，呢單交易會係重磅交易。你分派俾我哋每人10克，就算200個人全部俾人拉晒，其實都不過只係兩公斤嘅可卡因。但係只要你哋令到班差佬唔得閒理你地，你哋想交易幾多都可以。因此我哋只不過係犧牲品。」


 
「我嘅推論有冇錯啊？灰鷺先生。」我說，我覺得自己現在就像金田一少年事件簿入面的金田一一樣。
 
「啪、啪、啪。」
「掌聲鼓勵。」灰鷺繼續沒有帶有任何情感的說，完全沒有被我的聰明才智嚇到的意思。
 
「的確，警察係我哋叫嘅。」
「不過，你嘅推論有一個嚴重嘅盲點。」