醫院的瘋狂殺戮: 第二話：規則

那是把非常古怪且極不自然的聲音，典型「聲音經過處理」的類型。

「我已經將醫院嘅所有出入口封鎖晒，冇人可以離開，亦即係話，你哋咪諗住可以退出遊戲。」那把聲音續道。

封鎖了所有出入口？難道這個人要把我們禁錮在醫院內？

「仲有，醫院嘅對外通訊網絡亦畀我切斷咗，加上斷水斷糧，你哋冇晒生存嘅必需品，一切都要聽從我嘅指令！」這個神秘人說完這句話便「呵呵」大笑。

原來是你這個怪人在搞鬼！





那人終於停止發笑，說：「你哋可以叫我做『殺戮大師』。我花咗唔少時間嚟設計呢個遊戲，依家整間醫院有咁多人陪我玩，諗落都真係好開心。呵呵呵……」  

變態！

「係時候講解下遊戲規則。你哋要留心聽清楚，我唔會再講多次。如果唔聽清楚，後果要自己一力承擔。

「遊戲開始後， 我會持續派任務畀你哋，每個任務限時兩個鐘。只要有任何人能夠喺限時內完成任務，全間醫院嘅人都唔需要接受大懲罰，而且完成任務嘅人仲可以得到獎賞，包括一件武器、一啲日用品同埋一次『豁免機會』。每次受獎賞嘅名額最多三個。

「不過，一旦冇人能夠喺限時內完成任務，你哋就要接受『鬥刑』，全間醫院嘅人要共同選出七個人進行生死格鬥。喺呢場格鬥中，最後只有一個人能夠生還，其餘六個人都要死。死唔去嗰個會得到一次『豁免機會』。





「好啦，等我解釋下咩叫『豁免機會』。『豁免機會』等同免死金牌，喺每次『鬥刑』期間，擁有『豁免機會』嘅人唔可以被挑選成為『鬥刑』中嗰七個人選。而經過每次『鬥刑』後，擁有『豁免機會』嘅人，佢哋持有嘅『豁免機會』會被自動減去一次。

「最後，呢個遊戲唔容許任何逃走嘅行為。所有企圖逃走嘅人固然會被即時處死，而且我仲會贈送全間醫院一次『槍禮』。喺五秒內，你哋會遭亂槍掃射，就算係擁有『豁免機會』嘅人都唔例外。如果真係發生咁嘅情況，就唯有祝你哋好運啦！呵呵呵！」

一個戴眼鏡的男護士聽那自稱「殺戮大師」的人說完遊戲規則後，哈哈大笑，說：「對我哋亂槍掃射？你咪講笑啦！連一個槍手都見唔到，射個屁啊？」

男護士剛說完，那個「殺戮大師」已接着說：「你唔相信我講嘅嘢，咁你咪試下打爛個窗，睇下啲子彈喺邊度嚟囉。」

為甚麼「殺戮大師」能夠聽到男護士的話，並即時作出回應？難道這個人在暗處安裝了竊聽器？抑或，這個人就在我們附近？





聽了「殺戮大師」的話，男護士仍要作出反擊：「你憑咩叫我哋相信你？」

「呵呵！想要證明？我即刻可以證明畀你哋睇。」

聽完「殺戮大師」的話，我有預感將會發生非常恐怖的事情。

果然，男護士上方的一塊假天花鬆脫墜下，擊中男護士頭部。同時，一口鍋子自天花板的缺口跌下來，鍋內的棕紅色液體傾瀉而下，不偏不倚地澆在男護士身上。

「呀！救命啊！好痛啊！」男護士倒在地上，抱着頭慘叫。他肢體扭曲，皮潰肉爛且冒出白煙。潰爛的皮肉自他身上脫落，鮮血亦自他體內流出來。

旁觀的人被嚇得不懂反應，任由男護士躺在地上慘叫，直至他停止掙扎，人們才驚覺他已經死了。

全場鴉雀無聲。此時，「殺戮大師」再次透過廣播系統對整間醫院的人說：「我啱啱用濃硝酸殺死咗一個質疑我嘅人。如果你哋唔信，可以去八樓睇下條屍。好啦，仲有冇問題？冇嘅話我就要開始遊戲啦。」

「我有問題要問。」一把男聲響起。





是陳醫生的聲音。

陳醫生說：「你話依家係同我哋玩遊戲，但係我想知道呢個遊戲幾時先玩完？」

「殺戮大師」聽了陳醫生的話，「呵呵」大笑，回答說：「幾時完？呢個真係一個好問題！我都冇諗過個遊戲幾時結束喎。嗱！一係咁，我玩厭咗，自然會叫停個遊戲，到時再通知你哋都唔遲。」頓了頓，再說：「好啦，實在講得太多，搞到我好唔耐煩。Are you ready ? 依家遊戲正式開始！」