醫院的瘋狂殺戮: 第一話：遊戲

我打個呵欠，睜開雙眼，呼吸着病房內帶點消毒藥水氣味的空氣。

為甚麼我會住進醫院？還不是拜那該死的小巴司機所賜！就是因為他不小心駕駛，害我住了三個月醫院！

我瞇起雙眼，望望牆上的掛鐘。

下午五時三十六分。明明午睡了兩個小時，理應精神奕奕。但不知怎的，濃濃的睡意仍死纏着我，像要把我拉回夢裏。

「咯咯 ──」就在我正要閉眼，準備重投夢鄉的時候，敲門聲響起。





我掀起被子，從牀上爬起來坐到牀沿，對着病房門口高聲詢問：「邊個呀？」

房門打開，我的主診醫生陳醫生和漂亮女護士張雯欣走進病房。「係我呀！瞓咗個晏覺，應該好精神啦！」陳醫生微笑着說。

我偷眼望向站在陳醫生身後的張雯欣，欣賞着她秀麗的臉龐、白裏透紅的肌膚、烏黑的秀髮和窈窕的身材。同時，亦不忘回答陳醫生：「你估錯啦！我瞓完晏覺仲好攰。如果你哋冇入嚟，可能我又會再瞓過。」

「呵呵，即係話我哋整醒你？咁使唔使我哋向你道歉？」陳醫生裝作生氣地說。

「講下笑啫，唔使搞到道歉咁認真！」我笑着說。





陳醫生展露笑容，以輕鬆的口吻對我說：「睇你現時嘅身體狀況，一切正常。唔好霸住醫院啲牀位啦，聽日可以出院。」回頭對身後的張雯欣說：「妳幫佢量下體温同血壓，我依家出去先。」

陳醫生離開病房後，張雯欣按照吩咐替我量度體温和血壓。

「你嘅體温同血壓正常，冇咩問題。」她邊說邊收拾妥當，準備離開。我看着她的側影，她的一舉一動總是如此迷人。當我還在盤算如何開口問她取電話號碼，她已經步向房門。

「等陣，咪走住！」我在她踏出病房前叫住了她。她停下步來，轉身面向着我，問：「咩事？」

「我……我想……想問妳……攞……攞電話號碼。」我結結巴巴地說。雖然我看不見自己的臉，但我肯定自己早已害羞得面紅耳赤。





張雯欣「噗哧」一笑，說：「我依家仲要做嘢，呢啲嘢遲啲再傾。」說畢，便轉身步出病房。

甚麼？遲些再說？她說這話有何意思？是否代表我還有機會？

現在睡意全消，我只好拉開牀頭几的抽屜，拿出抽屜內的手提電話，給媽媽打了通電話。

「喂！媽，係我呀！你個仔呀！」

「死仔！你終於肯打畀阿媽嗱！究竟咩事？」電話另一端傳來媽媽的聲音。

「媽，我聽日出院，可以返嚟屋企啦！」

「係？咁就好啦！你知唔知我等咗呢日幾耐？等我聽日嚟接你……」媽媽的話還沒說完，通話卻突然中斷。

我重新撥號，不通。





再撥號，還是不通。

最後，我選擇放棄，把手提電話放回牀頭几的抽屜內，並離開病房，打算上洗手間。

我走到走廊盡頭的洗手間，推門而進。

奇怪，我一進洗手間，就感到一陣莫名的不安。

是甚麼讓我感到不安？我說不出來。我只能說，洗手間內有種別於平時的氣氛。

算了，別想太多，還是撒完尿，洗手後趕快離開。

咦？怎麼水龍頭沒有水？我嘗試了數遍，但仍沒有水。





我心裏的不安感持續放大。我不敢逗留，快步離開洗手間。

「點解我部手機上唔到網嘅？」這是我經過一個探病家屬身旁時聽到的一句話。

「我都係啊！仲要打唔到電話！」另一個家屬說。

我沒有理會，加快腳步，來到升降機門前。

我要到G樓的飯堂買些小吃。

升降機門打開，三個男醫生走出來。為首的男醫生回頭對身後的兩個男醫生說：「都唔知點解，個canteen又會無啦啦畀火燒，搞到畀人封咗。」

聽了那個男醫生的話，我立時呆站在原地，動彈不得。那三個男醫生則在我身旁走過。

甚麼？飯堂發生火警？





有誰可以告訴我到底發生甚麼事？

不能打電話，不能上網。

古怪的洗手間。

被火燒掉的飯堂。

三件看似不相干的事，同時間發生在這間醫院。這未免巧合得異常。

我認為種種事情之間存在着難以察覺的關係。

此時，醫院的廣播系統傳出一把聲音：「呵呵，歡迎你哋嚟到參與呢個由我精心設計嘅殺戮遊戲！」