[高中][少甜]《如陽光伴我》: 四十一， 妳的快樂時代（上）

「叮噹、叮噹、叮噹」

幾秒後晴打開門。

「生日快樂！」今天我穿起家中為數不多的純白色恤衫。

「咁早到嘅你！多謝你呀，靚仔。」晴笑容滿臉，來到生日的這天，她基本上已經不需要用拐杖都能夠順暢走路，看來康復的程度比想像中快。

她還穿着平常在家穿的T恤，還有橡筋短褲，有點睡眼惺忪的樣子，快到中午，她看來才剛起床不久。



「死啦，大哥哥你咁悉心打扮嘅，我仲咁頹添。平時好日都唔見你着恤衫！」她摸摸頭看着我說。

「我分唔到你係串我定係讚我...快啲換衫啦！」我著急。

「下，去邊啊...唔係補習咩？」她傻眼的問我。

「生日流流補咩習，白癡。」

「咁去邊啊？」



「麥當勞囉，你唔記得啦咩？你話想食豬柳蛋漢堡。」我反問。

「嘿，係喎，咁你等我一陣！」

「着靚啲呀！」

她用了點時間在房間內配搭，最後換了一條高貴的深藍色連身裙，露出漂亮的鎖骨和纖幼的雙手。

「呢條裙你覺得點啊？」她臉泛紅的問。



「完美。我同你呢個配搭一定會俾人覺得係去食法國米之蓮餐廳fine dining。」

「我哋都係去食fine dining呀，不過係去美國餐廳，而且時間比較早姐！」她笑著說。

我扶她到地鐵站，她穿起漂亮的晚裝，卻一拐一拐的走起來，很是可愛。

「係啦，其實調景嶺都有麥當勞。做咩要去將軍澳尚德？」

「嗰間大啲。坐得舒服啲嘛。」

「明明就係調景嶺嗰間大啲，不過你竟然做埋資料蒐集！」她有點意外的說。

「係咪好感動呢？」

「直頭想喊添啊！特別係嫲嫲今日好似唔記得咗我生日咁，竟然一早冇講低就出咗去！冇心肝，我要罰佢一個星期冇得食鍾意食嘅餸！」



「可能佢去咗買禮物呢？」

「哼，最好係啦！都係你有孝心！」她開玩笑的說。

我們在將軍澳站下車，花了好一段時間，我細心的攙扶着行動不便的晴，緩緩的走到離地鐵站有點遠麥當勞。

走進麥當勞，我們點了兩個豬柳蛋漢堡以及一個麥樂雞餐，等待顯示牌彈出我們單據上的數字。

「喂，食fine dining，點解其他人着得咁求其嫁？」她在我耳朵旁邊悄悄的問。

「實在係太過唔尊重個場合...」我生氣的說。

「講嘢仲咁大聲，一啲餐桌禮儀都冇！」她說完之後，忍不住笑了。



「鄙視呢啲人！」

「Thank you very much.」我用紳士的方法禮貌地打招呼和道謝，再從被我嚇呆的員工手上，接過裝着食物的托盤。

「喂！好尷尬呀！過咗火！」晴笑著拍我的手臂，倚傍在我身旁。

「尊重場合啊。你再打我，倒瀉曬無得食嫁啦！」我笑著回應。