[高中][少甜]《如陽光伴我》: 心如的日記（二）

2011年10月2日 星期日 雨

比賽輸左…明明只係第一場比賽。支援唔到隊友，執行唔到教練既戰術，係我既錯，我太多問題、太多煩惱，我點解成日都諗咁多無謂野既？

最近醫生開既藥令我完全集中唔到，成日都要覆診，返學對我來講愈來愈難，好彩學校好似完全唔介意我唔上堂咁。由細到大，最常聽到屋企人問我既就係，點解我連哥哥一成都無、到底我係唔係佢地親生？既然佢地係咁諗，既然最好既基因都已經比曬哥哥，點解仲要生我？

我都好憎自己，點解自己咁無用...我真係好努力去面對，但我好辛苦，真係好辛苦。 2011年10月5日 星期三 陰

今日係比賽完左開檢討會既日子，教練今次竟然無好似之前咁鬧我，檢討完左仲同我地成班有講有笑。臨走既時候，上次M2班個男仔竟然黎左debate team搵我，話想我加入佢地「陽光補習社」（救命！個名好奇怪啊！！！）。



不過佢真係講到好多佢地想搞讀書會、補習班既願景，我諗佢地真係有心！？如果幫到手既話，我都想可以出一分力啊，反正應該好容易～無問題掛？而且輸左比賽:(:(，都叫有時間剩左，一於咁話啦！

係啦…個男仔好似叫…豪？

2011年11月3日 星期四 雨

為左準備下學期既比賽，最近有一堆既訓練要進行。教練終於將上一場輸比賽既不滿發洩出黎，我知道自己表現好差，但我真係唔想咁…

我好努力想打好dd，想可以有更多機會去發揮自己，我鐘意debate，係少數屋企人想我做，而我自己又真正喜歡既活動，就算去唔去英國都好，中五都已經係最後一年啦，好想可以帶住班隊友行得遠dd，再遠dd，至少可以證明自己曾經存在過，獨立存在過，而唔係喺哥哥同埋屋企人既陰影同控制下。



P.S. 啊！喊到傻左既時候，好似比豪見到，好醜樣啊，我仲答應左要去佢地個陽光補習社參加活動！我諗佢一定會同佢幾個朋友笑我啦（？）。好樣衰啊！

2011年11月10日 星期四 晴

今日上堂無咩特別事發生過…至於放學就去參加左陽光補習社既讀書活動，讀書會既題目係《海邊的卡夫卡》...

參加活動既人雖然唔多，睇左本書既人都唔多，不過好彩豪答到咀，如果唔係未得我一個講囉？咁樣就一定會好奇怪。（雖然今日都有少少奇怪: D）

後來豪同邦好似有少少爭拗:(，本來我都覺得搞唔搞讀書會根本都無咩所謂，但豪就好似覺得因為答應左我但又做唔到而覺得好內疚，於是我叫佢差住我先。唔知最後會唔會真係有「亦舒讀書會」呢？



不過無所謂啦，其實本身都唔預左會有咁既機會～最令我覺得意外既係豪，原來佢係一個會守諾言既人，而且真係有睇佢口中所講既書。

放學之後，佢同我都留左係到，我地傾左一陣計，佢話佢好想做一個小說家，佢份人原來比我本來比我當初想像既有內涵好多，我答應佢，如果佢真係出到書既話，一定會做佢第一個讀者…唔知佢會寫咩書呢？

啊…如果係愛情小說既話，我驚我會忍唔住笑佢 : D。佢仲送左盒朱古力比我，係用好奇怪既唐老鴨盒裝住…到底係邊到買嫁？

不過今日真係好開心！好耐都無咁開心啦。