[高中][少甜]《如陽光伴我》: 負四，綿綿（上）
心如的宿舍就在附近，她提議先回去換掉我們全身濕透的衣服。直至走到她家前，我們都沒有說些甚麼，但我一直都沒有放開過她的手，一秒都沒有。
她的家有暖氣，基本簡約的傢私都有，有兩間房，屋內的雜物來看，應該有好幾個女生住在這裡。
「再夜少少就會好凍嫁啦，病左就大件事。」她打開房內的衣櫥，把一件她鬆身的長袖T恤和一條Jack Wills綿褲遞給我，「你咁瘦，應該會着得落。」
「唔該。」我到洗手間把濕冷的衣服換了，心如的衣服散發一陣她獨有的香氣。
「傻仔，你個頭濕曬啦，又唔抹下佢。」她拿起手上的毛巾，仔細地抺去我頭上的雨滴，我輕捉住她的手，她臉紅的看著我。
「做咩啊你...」
我等不及她說完，向她的臉親下去，她沒有避開，只是輕輕的放下手上的毛巾，轉為緊緊捉住我的手臂，就像在飛越太空山上一樣。
我用手觸碰着她的臉，如絲般的皮膚，凝視着那隻通透但看不透的眼睛，然後把她整個人擁進懷內，抱了不知多久。
「嘿，再攬就天黑嫁啦傻仔。」
「我唔理，我唔想再放手。我放手過好多次，我唔想再放開。」我說。
「傻...」她全身發熱，不知道是因爲太害羞還是被雨弄病了。
「咔嚓咔嚓」門突然打開了。
「Oh...Shi...」一個女生在門外叫。
「嘩！」我嚇呆了。
「Sorry啊Nancy！呢個係我朋友阿豪，係我佢嚟換衫嫁。」心如尷尬地解釋。
「唔緊要啊Katrina，當我唔喺到得嫁啦，Just Have Fun！」這個叫Nancy的女生操不太流利的廣東話，應該是在父母在九七移民潮離開，然後在英國本土長大的第二代。
「唔係啊唔係啊，我地出去嫁啦！」如隨手拿起兩件乾濕褸，推了我出屋外。
雨過天晴，曙光穿過雲層。如帶我往地鐵站方向走，我輕捉住她的手，她配合的把手掌放鬆，讓我拖著她。她說要走半公里的路，怕我會累。不要緊，我說，慢慢走，這樣我可以跟你多聊一些。
「豪…點解你突然會嚟既？」她問。
「因為搵你唔到。」我說，「你無回信、轉左電話，如果唔去英國，點樣先可以搵到你？」
「對唔住...」
「其實…我地算唔算一齊左？」我問。
「…我都唔知…你喜歡我？」她反問。
「嗯，好喜歡。應該係話好愛你。」
「我…唔覺得自己值得呢份愛。」她語塞，「點解你要咁傻？」
「因為咁。」我停下來，舉起我們拖著的一對手說：「因為我愛你。」
「傻瓜…」
「我有好多野想講、有好多野想問你…」我說，「點解你要話同Jayden一齊左？」
「我覺得…可能你都係忘記我會好啲。我真係唔係一個值得你對我好嘅人…」如說。
「喂，黎心如，你點可以為我決定呢？我唔想忘記你。」我說。
「點解啊？」
「唔知。總之就係好掛住你、好想見到你笑、好想喺你喊既時候陪住你既一種感覺。老實講，我一直都以為你係對Jayden有意思…」
「我以前從來都無話過我鐘意既人係佢！」
「咁你鐘意既係邊個？」我問。
「哼！唔話你知啊！」她面紅耳赤，想要作勢掙開我的手，卻被我拖得更緊。
「唔可以再鬆開手。」我說。
「嗯...」她害羞的小聲回應。
「呢幾個月我冇停過諗你。我唔想你再收埋自己…」
「對唔住呀。我轉左地址、電話所以無人搵到我，唔想再一個住喺原本嗰到，所以同學校同學夾份租左啱啱嗰間Apartment，Nancy係我roommate。我本來都決心要放棄同你…地既關係，所以咩都冇講冇通知。」她說。
「唔好再講對唔住啦！要講都係我講。」我說，「如果我當初可以有勇氣就好…」
「係呢，你係點搵到我㗎？」她問。
「搵唔到㗎，睇信知道你讀咩學校，然後喺出面等，好彩只係等左三日。」
「最近我狀態好差，幾乎幾日先返一次學...對唔...」她想道歉。
「再講嗰三隻字我嬲㗎。」我說。
「豪，我有好多嘢想同你講。」她把頭靠向我那一面。
「我知道...我都係，好多嘢要同你分享。」
我們坐上District line 往Gloucester Road，如說想要去那邊的自然歷史博物館。
我們坐上District line 往Gloucester Road，如說想要去那邊的自然歷史博物館。
「Gloucester Road...告士打道？」我問。
「係啊，好多香港既主要幹道都係以倫敦既街名命名。」
「呢到好多野感覺都好似香港。」
「好多嘢都好似。紅綠燈、牌子、飲食，香港人都好多。不過呢到唔係香港。呢到無思琳無阿俊無阿傑無雯雯無阿邦無陽光，而且無你。」她說。
「我而家未喺到囉！」
「但係你要返香港嫁...」
「嗯…其實...我後日就要走，因為三日之後就要Midterm...而家住喺蘇豪區嘅Hostel。」我說。
「…咁快。」她有點失望地說。
「放心，我一定會諗辦法再過嚟搵你。我會儲錢…咩都好！」我說。
「傻，咁當然係讀書要緊啦。」她說，「係呢，你讀間邊間啊？」
我拿出銀包內的中大學生證秀給心如。
「拿，你睇下。」
「中大BBA...叻仔！」
「唔叻啦，27分。比你差好遠...不過你同我講既野，我會一直記得。」
「咩喎，我都冇考，我依家仲係高中生咋。係呢，咁你英文幾多分呀？」
我舉起四隻手指。
「抵錫！！果然冇白費我一片心機。咁你鐘唔鐘意間學校嫁？」她由衷的為我感到高興，雖然放榜已經是三個多月前的事，但我們一直都沒有聯絡。
「無話咩鐘唔鐘意，只係純粹無咁討厭，比起讀書，我鐘意睇書多啲。不過學校好大好多綠色，壓力都好似無咁大。而且有住宿舍，叫做好方便。」
「唔使問啊，你實係奇奇怪怪咁，日日留係房無所事事啦，Roommate會唔會頂你唔順嫁！」
「阿水佢好感激我嫁。佢個癲佬每日都有兩個習慣。第一就係佢一定要飲到好醉好醉，如果唔係好多次我喺佢嘔之前推佢入廁所，抹地都抹死佢啊。」
「咁仲有另一個習慣呢？」她笑著問。
「另一個習慣就係佢每日都要凌晨一點既時候自慰，唔可以遲唔可以早，一定要一點。所以盡可能我都會喺一點前訓教，如果唔係…有時我半夜既時候訓唔著，又聽到吱吱、吱吱咁既聲，真係忍唔住想開眼望下。每一次我都後悔，係每一次！」
「好核突啊！」她幻想著畫面，笑得咀無法合起來。
「如果有機會，我都想捉佢入去自然歷史博物館。簡直係大自然既奇觀。」我說。
這座自然歷史博物館比我想像中更加宏偉壯觀，除了面積大，外圍的設計就像在電影入面看到的傳統英倫風格建築物一樣，甚是典雅。
我們步進博物館，展品按不同年代、環境分散在不同區域，我們只是隨便逛逛，既沒有很認真的看展品上的描述，也沒有想去了解任何有關歷史的事情，只是漫無目的的走著，然後分享互相的近況。
「中大真係好大，行極都行唔晒，不過地方越大，個人就越空虛。中學時期嗰啲朋友，一個不漏咁樣消失晒。我好唔鍾意呢啲轉變。你自己一個人過咗嚟生活，我諗孤獨嘅感覺，無人比你更加清楚。」我無奈地說。
「我知道。半夜諗住喺好遠好遠嘅你哋，個心好似戚戚然。不過我今日先發現，原來咁樣唔係叫孤獨。」她說。
「點解嘅？」
「孤獨係A掛住B，但係B唔會諗起A。而家知道咗原來喺你嘅世界入面都有我嘅存在，咁就唔可以叫做孤獨，最多只可以叫做寂寞。」
「雖然好難明…不過識得咁諗就好。從今以後，我連寂寞嘅感覺都唔准你有。」我說。
「好難㗎！」
「我會同你分享所有嘅嘢，你想唔想聽？」
「我等左呢一刻好耐啦！」
我把這幾個月發生的所有事告訴她，朋友的去向、工作時讀書時發生的事，Ocamp裡色迷迷的組爸、無聊的房game，甚至麥當勞灰髮女孩，我都一字不漏的跟她說。她知道後有點吃醋，沉默了好幾分鐘，我有點後悔自己太過誠實。
「我同佢真係咩都冇發生。」我解釋。
「真係？」她可愛的扁咀。
「嗯。同埋嗰時我都未知道你鍾意我...」
「我冇話鍾意你喎！」她說。
「哦，咁你而家即係收兵姐！」我扮作無奈的說。
「唔係啊...只係我覺得我冇愛人既權利、無爭取幸福既權利。」
「點可能呢，就連希魔希特拉都有屬於佢嘅愛情故事，你有冇佢咁過分先！」
「我可能真係唔係你想像中既咁…」她再次收起笑臉，有一刻又變回那個失落的黎心如。
「點解？」
「我唔識講。唔知點講。」
「好唔好唔係你話，係我話。喺我眼中無論發生任何事都好，你都一樣係99分。」
「咁仲有嗰一分呢？」她問。
「實在太好，有時我會覺得好自卑。」我用隻手掐她的臉，掐出一個笑容。
「點解你突然講嘢咁口甜舌滑嘅？係唔係呢幾個月係咁撩女仔！」
「冇啊。只不過係因為呢啲說話其實已經係我心入面練習左9999次，不過一直冇勇氣講出口，依家舒服晒！」我說。
「…呢兩日可唔可以講多啲俾我聽？」她抱著我說。
「可以，只要你唔嫌我煩就得。我可以不停咁樣講。」
「多謝你。」她溫柔地說。
「傻。」
經過恐龍的區域，我學著那些暴龍蠢蠢的走路方法，把自己的手縮在身體前面。
「哇！嘩！吠！」我裝著那隻來自侏羅紀的恐龍化石叫。
「好無聊啊你！」她笑著說。
「你話，只要我掛住你，你掛住我既話，就唔可以稱為孤獨。我覺得，只要可以令到你笑，就唔可以稱為無聊。」
「傻仔！」她高興地拖緊我。