[高中][少甜]《如陽光伴我》: 心如的日記

2011年4月16日 星期六 （雨）

今日媽媽爸爸決定要等我中四暑假開始左後就搬返去英國，我唔肯，死都唔肯。我好想可以留係香港生活落去，遠離佢地，去做自己喜歡做既事情。佢地咁憎我，點解唔比我留係到？

爸爸話我有毛有翼識飛，不停咁樣打我，好痛、喊，但我唔會求佢地唔好再打我，我只要忍到就得嫁啦！好快就會好天，佢地會走，我可以自己有屬於自己既未來，做想做既事，談一場我想談既戀愛，彈一首我喜歡彈既樂曲，做一個我想做既人。你得嫁，黎心如！

2011年5月20日 星期五 （陰）

解決左啦！估唔到學校都有用…因為老師同埋校長大力支持我，又幫我寫信比返家長，屋企人為左唔好搞大件事，我終於可以有理由留係香港，至少…多一年！就算時間唔長，我總算可以過一啲自己控制既生活。不過最近情緒都係好反覆～成日去到凌晨都訓唔到教，不過呢種惡夢一定好快就可以結束。



一定可以！

2011年9月23日 星期五 （陰）

今日本來都係好無聊既上課日。起身既時候個頭好痛、好痛，請左假，不過因為食晏之後好返少少，所以就決定返學啦~ 呢個決定果然無錯！

上M2堂身邊坐側邊個男仔居然懶醒出去答問題，黑板狂寫，但竟然係寫左另一條既問題既答案！！全班大笑（包括我 : D），點解會有人咁蠢又走去答問題都有？不過佢其實步驟各樣都係無錯，比起之前教佢d數既時候，佢好似進步左唔少（?）。

嘿，其實有時返學都幾開心啊，無聊下、奇怪下，都幾開心。