[高中][少甜]《如陽光伴我》: 三十五，最簡單的心願（下）

之後我們隨意的在街上走着，最後在那個因繁忙而聞名於世的十字路口停下來。已經完全入黑，圍繞在四周的霓虹燈廣告牌五光十色的閃耀着，與這個繁忙的過路處旁一盞盞的紅綠燈相映成趣，路口一如既往的人來人往。雖然遊客很多，但本來這個所謂景點就是以人流作為招徠，所以來訪者並沒有破壞如斯美景。

我們倚靠在馬路旁邊的欄杆，她靜靜地看着馬路中心。

「你睇下，」她指著十字路口中央的一個疲憊的上班族，「而家就嚟10點佢先啱啱放工。」
「分分鐘連夜晚飯都未食。」我說。

「又或者佢地。」她看着一對正在冷戰的日本情侶，女的急步向前走，男的緊緊的跟隨其後，有點想要拉着前方的女生，又有點不知所措。

「『你唔好理我啦，我地分手啦！』」晴裝著那個女的說。


「 『唔好啊！你走左邊個養我？』」我配合她。
「 『你其他女囉，唔好以為我唔知你出面收埋13條女！』」
「 『我無啊...我發誓...得12條喳...鳴鳴...』」我裝著哭聲。

「嘿！好無聊啊你！」晴輕輕的拍在我身上。
「明明係你扮先！」我還擊。

我們看著馬路中心沉默了一會，在這個不太熱的夏夜，涼風輕輕的拍打在我們的臉上。

「其實無人知道行邊個方向先啱。好老土呀。不過我真係咁諗。」



她說：「繼續追番個女仔係咪正確嘅決定，可能個男仔自己都唔知。繼續返同一份工未必會好舒服，但係個男人有佢嘅屋企人要養，係仔女嘅榜樣...」

我看著她，默默的聽她說。

「我唔知道未來係點，文憑試之後可能所有嘢都唔同晒，圈子唔同，入唔入到大學都唔知。嫲嫲唔知幾時會唔係到。老竇唔知仲會唔會返嚟。但係有一樣野我係肯定，我好想佢哋可以係我身邊，同樣地，我好想你可以繼續係我身邊。」

她轉過頭來看著我，「我同所有人一樣，唔知呢個係咪最正確嘅選擇。我都唔知最後會變成點。我淨係知道呢個係一個16歲嘅女仔最簡單但係最肯定嘅心願。」

「我鍾意你。」



她堅定地說。「唔係細路女玩玩下嗰種啊…係想永遠同你喺埋一齊嗰種。」

「我...」
「殊...」她把食指放到我的嘴唇上面，

「唔好答我。至少係呢個旅程入面，唔好話俾我知。」

「嗯。」

「唉！如果可以揀永遠唔翻去就好啦。」她輕輕擁著我，笑著說。
「會用晒啲錢。」我想了想，說。

「咁賣你去拍Gay片，比三個大隻佬輪姦！」她說，我居然幻想到那個情況，有點想作嘔。



「可唔可以拍AV？」我問。
「唔得嫁，如果我見到你攬住第二個女仔然後同佢做愛，我會好唔開心。」她抱緊我。

「啊，工作需要無辦法。」
「無錯，所以你一於去拍Gay片啦。」她抬起頭笑著，然後又用額頭輕輕碰著我的下巴。

晴拉着我的手臂走過馬路。我們在渋谷街頭逛了一會兒，快要接近午夜的時份，我送了她回去新宿的酒店。

「灰姑娘要準時返屋企去。」我說。
「如果唔係就會變返乞兒？」她問。

「唔係，如果唔係比巫婆老師Miss Tang發現咗，咁你個旅程就就此結束。」
「好可怕。不過你唔係暗示自己係王子掛？」她笑得彎起腰來。

「我邊有！」


「王子殿下，辛苦你啦今晚！」她笑著說。

我把她送到升降機口，然後從酒店外面看着她慢慢穿過走廊，回到房門口。她輕力的打開酒店房門，然後輕輕揮手跟我道別。

她傳來像在圖書館說話般一樣輕聲的錄音。

「早唞啦變態佬！今日玩得好開心啊！真嫁！」

「早唞啦白癡妹。早啲瞓。」