[高中][少甜]《如陽光伴我》: 三十五，最簡單的心願（中）

詩晴在大約15分鐘後走出來，穿的是簡單的白色修身Tee和牛仔短褲。

「Sorry啊，等左好耐？」她有點不好意思的問。
「我啱啱先到。不過係咪真係冇問題？」我說。

「嘻，你個無恥之徒誘拐未成年少女，但係又如此貪生怕死，點樣成大器？」她笑著說。

「我平時唔知你中文咁好。」
「多謝！」



雖然仍沒有明確的目的地，我們還是要先遠離她住的酒店。像偷情一樣。
「我估你應該食咗嘢？」我問。
「理論上應該係，不過啱啱老師竟然帶我地去食中菜，呢幾日啲伙食都差到爆啊！學校真係超級孤寒！所以為咗抗議，啱啱嗰餐我絕食！」

「無聲抗議...一定會有效。」我取笑她，她向我扮鬼臉。
「所以而家要去食嘢！」

「吉野家？」
「唔係呀！雖然你講起就有啲想食...」她伸出舌頭，說：「今晚想食串燒！」



我們如約定好一樣坐JR到渋谷，然後隨便在一家居酒屋坐下，除了燒雞翼和燒酒之外，我沒有任何特別要求，點菜交給詩晴全權負責。

「係啦，有啲嘢俾你。」我說。
「咁神秘？」她笑著說。
我拿出剛才夾的Hello Kitty送給晴，她看得雙眼發光。

「你點知我鍾意Hello Kitty同埋呢個款嫁！」
「唔知，亂咁夾。不過諗起...」
「諗起咩？」她好奇地問。



「諗起第一次見你嘅時候，你都係着住藍色嘅工人褲，所以見到呢隻就想夾俾你。」

「咁你都記得嘅？你個蠢材仲記得同我做過嘅咩野？」她甜笑著，高興的逗著手上的公仔，然後看着我問。

「所有嘢。」

我說，然後喝了一口侍應剛遞上的清酒。

她從我手上搶去燒酒瓶，也喝上一大口：「啊！爽呀！」

「你飲醉酒我就留你喺到。」
「跟住比幾個日本仔捉咗返屋企，你捨得㗎啦？」
「唔知呢。可能要試吓先知。」我說。

「扮啦你！我讚下日本高中生你都呷醋啊！」她說，我掐一下她的臉，不知道是不是酒精的關係，她的臉馬上變得很紅。



侍應逐次逐次遞上不同的串燒，有我不吃的燒大蔥。
「你做咩唔食啊？」她問。

「因為好醜樣。」
「你仲醜樣啊！唔准揀飲擇食！食大蔥聰明啊！」

「唔食。」我說。
她拿起大蔥，餵到我的咀前。

「啊...」她著我開口，好像小朋友看醫生那樣。
「唔...」我不想吃。她有點扁嘴。
「好啊好啦，啊...」我張開嘴，她把大蔥放進我的口裏咀嚼。

「係咪好食呢？」


「又好似係...」我不想承認的說。
她有成功感的笑着繼續吃。

晚飯過後，我們走上渋谷的街頭，在一條條充滿特色店舖的窄巷中穿插，古玩店、精品店佈滿四周。我們經過一間時裝店，晴說想去看看，她在店內拿起幾件純色襯衣在我身上左拼拼、右拼拼，然後走去結帳。

「你做咩啊？買比男朋友？」我問。

「買比你呀！成日着埋啲冇嚟精神嘅T恤，個人點會開心喎，着返一兩件恤衫，企直個人，人睇落都有活力啲啦 ！」

「我冇話買喎...」
「我都冇話要你買，我送俾你㗎！」她笑著說，聽到這句說話，我忍不住笑了起來。

「你笑咩呀？蠢材！」
「我笑你。」
「有咩好笑喎！」



「好似比一個16歲嘅富婆包養我㗎。」
「我唔富，都唔係阿婆啊！」
「你唔富就等我自己俾錢啦。」我說。

「唔使！你會報答我㗎嘛！」
「例如呢？」
「嘿，你知嘅...」她奸笑著。

「救命，淨係你食得唔得？我而家真係好憎和風牛肉飯。」
「啊，溫泉蛋牛肉飯啦咁...」她想了想說。

「真係有分別咩？！」我激動地笑著說，在排隊結帳的其他人都朝我這個方向望過來。

「好失禮啊你！我有錢一定唔會包養你呢啲咁嘅變態佬！」