[高中][少甜]《如陽光伴我》: 三十二，祝 一切順利（下）

收到信的一刻，心情很難形容。我呆了的把信看了過百遍，每看一點她親手寫的文字，心都再甜一點。基本就好像碎掉了的人生，在讀信的過程中一點一點的重新組裝起來。

只是一想到她已經遠在天邊，一想到她大概又會自己不發一言的離開，我心情又低落起來。我跟她還有可能嗎？她到底當我是一個甚麼的存在，好知己？喜歡的人？還是只是一個普通得不再普通的朋友。

不管了。至少她主動找我，跟我說話，還跟我道歉。我根本沒有不回信的理由啊。但想著想著，我卻沒有可以寫回頭的事情啊。我的人生變得一團糟，難道要告訴心如我每天流連網吧過活，沒有學習、沒有夢想嗎？

我真的說不出口。我也不想再說謊，再騙自己最喜歡的女孩。我必須先花一些時間重新整理自己，做一個自己可以接受的人，心如才會再像以前一樣，因為我而感動，因為我而快樂。

結果我把回信推遲了整整一個月至11月底，直到終於有足夠的故事值得跟她分享，才給她回信。



//
如：

多謝你寫信俾我。

唔好講對唔住啦，我覺得寫信係好好嘅方法。至少我唔使又亂咁講嘢，講埋啲不負責任嘅說話，傷害其他人，特別係你。所以就算要講對唔住，要對唔住嗰個都係我。一直都以為你可能嬲咗我，依家先知道所有事情嘅緣由。

新年之後好快就考Mock，成個暑假同上學期都浪費曬喺打機。唔知點解，總係提唔起勁拎起本書咁樣，可能因為LOL太好玩啦。哈，不過收到你封信之後，我即刻諗起「係喎，原來我要開始讀書嫁啦喎…」，開始識驚啦！

仲要係驚到死嗰隻，而家一放學就同邦去自修室溫書。係啊，天水圍開咗一個新嘅圖書館，好似叫屏山？雖然圖書館未正式運作，但係自修室就已經大排長龍。但就算係外面，我都會拎住本書睇，入到去就做卷操卷，就好似以前陽光補習社咁樣。雖然得返我同邦，不過就算你唔係旁邊，我都有日日抄生字嫁！我去學校附近間文具店買左10本唐老鴨筆記本，又抄又記，又記又抄，希望拎到3以上啦。



再唔努力溫書既話，就算12月唔係，DSE都會係我的世界末日...

講起世界未日呢...我唔信真係有世界末日呢樣野。不過你嘅提議可以參考一下，唱K係好提議，但係佢哋全部都忙到痴線啊，我諗要約齊人真係好難，就算約得齊，都仲差咗你。

邦個衰仔而家無得去街就成日痴住我囉。佢女友忙到傻咗咁，今年做咗排球隊隊長，仲選埋社長，邦話同雯已經成兩個月冇出過街咁濟。平時佢就玩開女仔，今次佢竟然成日心掛掛，仲唔到佢上得山多終於虎！

雖然抵死，不過佢真係煩到抽筋...日日喺我身邊依依哦哦，心情咁反覆，又唔認真，都唔知佢讀唔讀到大學添啊。

雖然已經過咗咁耐，傑同佢仲未好返啊…邦知衰啦，而家成日話我地七個係「豪乳邦民林俊傑」，一個都不能少，姐係「豪、如、邦、雯、琳、俊、傑」，拿，唔好問我點解你個名變成「乳」…佢改嫁！



講開傑，佢個衰仔最近仲開始拍拖添，呢，同你嗰班叫楊依霖既女仔，不過佢就同邦都仲係無咩兩句咁。都唔知要咩機會先可以令佢地講返嘢。頭痕啊。

至於琳呢，就接任你做咗Eng De隊長，呢樣你應該知啦，不過佢仲同好契弟阿俊一齊左啊！！！

我諗呢樣佢應該唔夠膽開口同你講…係咪好震撼呢！一個S底一個M底，好似一拍即合咁。俊仲係好乖好聽話咁樣經營緊學會，總之今年個個都好似好幸福啦。

至於我，而家除咗DSE之外咩都唔使諗、唔想諗、唔敢諗，捱多半年都唔夠，就可以入大學啦！希望夠分啦，我唔奢望自己可以入到三大...入八大嘅話應該合理期望嘅！

你都要加油，唔使俾咁大壓力自己，你一定可以，就算唔係最理想嘅嗰一條路，你已經比好多人都優秀。你話你媽媽會好嬲你，但其實你已經好叻，佢心底一定會以你為榮。

係呢，仲有你爸爸呢？無聽你提起過嘅？

啊！講返世界末日... 如果有呢一日嘅話，我最想係同你地幾個一齊過，對我嚟講，呢個學會唔單單係中五最難忘嘅回憶，仲係我人生最重要嘅回憶。最估唔到嘅係，原來我哋對你來講都一樣係咁重要。



多謝你。

不過咁，點可以咁快世界末日啊，你唔記得咗我話我地成班6個會同你去蘇格蘭嘅大草地啦咩，幫你同你愛人煮嘢食，又話要一齊睇晒Lily Collins 既戲，全部都未做，我唔想再唔遵守承諾，所以邊個想搞到世界末日嘅話我就斬邊個。你放心啦！

好快就係聖誕節。時間真係過得好快，咁就一年。

你仲記唔記得上年26號我地一齊過？雖然倫敦冇迪士尼，但倫敦嘅聖誕氣氛一定好濃厚，有好多好味嘅嘢食，好好享受一下，唔好咁掛住我地。

雖然信可能喺聖誕節之前送唔到，希望可以係你生日之前到啦。

我一定會等你回信。

祝你生日快樂、聖誕快樂。

豪


2012年11月29日

//

我把信對了好幾次然後寄出，不知道她甚麼時候會回信，甚至不知道她會不會回信。

我只知道我心底的情感一秒都沒能離開過她。