[高中][少甜]《如陽光伴我》: 三十二，祝 一切順利（上）

中五升中六的暑假，人人都忙着準備文憑試。我卻完全沒有這個心情，繼續整天流連不同的網吧，黃昏時分才醒過來，吃一點東西就開始打電動、玩到天昏地暗就吃、吃完再換過一間網吧，藍天也好、陽光都好，重要嗎？

不想回家。家中是一個有關係卻要裝作沒有關係的「姨姨」，還有一個沒有關係卻要裝作有關係的叔叔，除此之外，什麼都沒有。

不想學習。這麼努力是為了什麼？追上黎心如。她都不在了，還努力是幹嘛？還不如當個電競選手，加入TPA，再拿幾個世界冠軍。

還演著傷心又有何用？有人看見嗎？我的世界是漫長的黑夜。黎明時分都不會再來臨了，心如刀割又有甚麼意思？

開學了，要不是因為不上學就一直不能畢業，連學我也不想上。喜歡的人沒有了，朋友也沒有了，大家說的都是廢話，承諾都是廢話。我就知道，我們幾個不可能一直都是最好的朋友。



喂，你點啊？俊問。

我都企得返起身，你都一定得。傑說。

做咩姐你？又話入大學？你照下鏡啦！邦罵。

不想知，我都不想聽。

我維持這樣的生活，一直直至10月尾的那天。



我收到了一封來自遠方的信。

//
豪：

好耐無見。

好抱歉過左咁耐先聯絡你。唔係我唔想搵你，因為我花左好長既時間先寫好呢封信。你可能會覺得，點解唔可以打電話、又或者send個WhatsApp啊？我唔係咁擅長去講內心既野，如果要我即刻諗好要講咩，大概會講出好多唔係心底真係想表達既野。

我諗琳已經同你講左，大考之後我就匆匆忙忙咁樣執行李，然後飛去英國。咁急飛去英國係屋企人嘅意思，其實佢地想我離開香港已經唔係一朝一夕嘅事，之前有同你講過，中四嗰年全家移民，暑假嘅時候佢地已經要我走，不過我一直死都唔肯走，拖得就拖，難得可以自己留喺屋企，我好想可以用中五呢一年嘅時間做自己鍾意嘅嘢，但而家去到高中就快要完結，佢地都安定左，已經再冇藉口啦。



呢兩年，我會喺英國讀A-level，媽媽好想我好似哥哥咁考到入名校，牛劍、LSE呢類學校讀Law，如果考唔到佢一定會殺咗我。我依家一個人住喺倫敦附近讀書，屋企人就住喺稍為北部嘅城市城市York約克。

嘿！到你讀大學嘅時候，我仲係中學生！到時我一定會笑你老！你肯定仲會成日着埋啲頹tee出街啦，計我話，讀中大就啱晒你。你啊，一定要話比我知大學既生活係點，住hall係唔係真係溝女好容易、O camp係唔係真係好恐怖？我靠你嫁啦。

其實我最想講對唔住嘅係不辭而別。知道要離開，我都用咗好多時間先收拾到心情。按照本來嘅計劃，其實完咗今年嘅debate，同班隊友一齊贏埋最後一個冠軍，我應該了無牽掛先係架嘛...

一直以來自己過嘅都講唔上係幸福嘅日子、亦都唔係自己想要嘅人生，所以諗住無論係香港定係英國根本就冇分別，就算要離開都唔會唔捨得。

令我最意想不到嘅係喺呢一年我遇見你地，好似俾咗一個屋企我咁，從來都冇諗過自己可以咁放鬆、咁投入咁樣去做一件事，仲要係我本來就最討厭既讀書。多謝你，係你改變左呢一切，令一切變成有意義。

只可惜唔可以繼續落去啦。估唔到只係一年，個世界可以變得咁快。要搬返去同屋企人咁近…好討厭！好掛住你嗰啲無聊嘅笑話，奇怪嘅呼吸方法，超級難聽嘅歌聲。本來我就咩都無...個天喺一年之內教識我，乜嘢叫做朋友，然後而家教埋乜嘢叫做寂寞。

係啊，我見網上面好多人話嚟緊既12月21日，係世界末日。你信唔信係真啊？世界末日你又想同邊個過？估唔到世界末日都要自己一個人過！



如果係你地嘅話，可能會一路喺K房食K-buffet一路尖叫《我的世界末日》然後成班喺度傻笑。不過今次我唔投陳奕迅一票啦，我覺得周杰倫嘅《世界末日》仲好聽！

♪ 想笑 來偽裝掉下的眼淚
點點頭 承認自己會怕黑♪

其實除左講上面嘅廢話，我最想同你嘅係以下呢樣嘢：琳琳同我講，佢話佢同雯呢排見親你剩係都掛住玩同打機，好似完全唔溫唔讀咁，千祈唔可以啊。

無論咩原因都好，你都唔可以放棄。你啊！中六過咗一半㗎啦，唔準唔讀書啊，掛住偷懶入唔到大學既話，有機會返香港嘅時候我一定會殺咗你。

你最近幾好嗎？佢哋一個二個又點呢？傑同邦變返以前咁樣未啊！記住啊，努力考試要緊，有時間先覆我啦。

祝 一切順利

如
2012年10月7日


//