[高中][少甜]《如陽光伴我》: 二十九，你將一直掛在我的心內（下）
「夢見你喎，我驚我唔捨得起身返學喳！」她說：「你有無聽過巴黎有塊愛牆？我覺得呢個idea幾好，不過叫愛牆好俗啊！我叫我間房呢面牆叫幸福牆，牆上面全部係我既幸福。你成日問我點解可以咁樂觀，如果你有咁多幸福既話，你一定都可以好似我咁成日笑。」
「但佢地大部分都已經唔再係你身邊。」
「你要記住啊，就算唔係身邊，唔代表佢地唔存在，更加唔代表你同佢地過去既回憶係假既。無任何人可以奪走任何人既回憶，呢份回憶永遠都係只屬於你既幸福。知道嗎？」
她輕輕的按著我胸口，突然我身一陣發熱，是很久沒有過的溫暖觸感。我那一秒真的很想捉緊她的手，但又自覺這樣感覺有點奇怪，很快便打消了這個念頭。只是呆呆的看著她，她呆著的把手停在我的胸前，好像感覺到我心跳聲，除了我們的臉變得愈來愈紅之外，整個畫面仿佛像定格了一樣。
在那短短數十秒，我和晴好像進入了另外一個的世界一樣。
一個只有我們的世界。
「...蠢材…知道啦。」我打破沉默。
久違了感覺。
心跳的感覺。
「你就蠢啊，就算以前無唔緊要。而家將我地既合照好好收起，等我做你既第一份幸福。咁你以後就唔洗苦瓜咁既衰樣啊！」
「嘿，點解苦瓜個樣係衰？」
「因為同你生得似樣啊！」她笑著說。
我小心翼翼把寶麗來放進銀包，然後跟她回到廳內補習。補習差不多完結時，晴的嫲嫲回來了。我好像一個有點奇怪的存在，但也禮貌的向她點點頭，只是她好像沒有留意到。
「嫲嫲！」晴熱情的向嫲嫲叫着，然後替她拿手上的東西，說：「嫲嫲啊，我買左餸啦，你做咩又買啊！」
「唔夠食嫁晴晴，你唔係話今晚會有朋友仔喺到食飯咩？」她的嫲嫲看起來已經有80多歲，但絲毫不會讓人覺得是一個不風雅的老人。
「嫲嫲啊！」她尷尬地說。
「你有朋友嚟食飯？」我問。
「唔係呀... 係呀，唔係呀我唔記得問你，本身諗住叫你留低食餐便飯，不過如果你忙，你可以走先。」晴說。
「唔係，我冇嘢做。」
「我諗住你難得咁遠水路過嚟，同埋你上次都冇食到我煮餐飯。」她說。
就是上次橙不見了的那次，我也在那次之後對晴產生了不一樣的感覺。有很長的時間我覺得那是因為我太寂寞而產生的虛假感情，是單純的情感依賴，但剛在那一刻，我卻又確確實實的感覺到那份情的存在。
「可以啊！咁做埋呢條數，你去煮飯？」
「唔係我去煮啊，係一齊煮！」
「我？」
「係呀你呀，唔通嫲嫲咩！」
做完最後一條數學題之後，晴著我跟她到廚房。
「整咩餸？」我問。
「鱷魚肉川貝煲豬骨湯，今朝煲落左！仲有涼瓜炆火腩啦、西蘭花炒牛肉、同埋蕃茄炒蛋！」她說：「係咪好熟口面呢，就係你上次冇食嗰啲呀！」
「對唔住啊，上次我唔係有心。」我說。
「緊你知你唔想啦，傻嫁咩，如果怪你就唔會再煮野比你食啦！」她說
「咁我要負責做啲咩？」
「切野，牛肉苦瓜西蘭花，仲有蒜蓉同埋蔥花！牛肉要切細塊少少，老人家唔可以食咁大塊。我灼下啲蕃茄，同埋準備腌料先。」
我們各自分工，晴有點不放心的在背後看着我，我努力向她證明其實我是懂得煮飯的。
「睇你切野，你平時自己真係肯做飯嫁喎。」
「係，詠謙教我。」
「不過佢肯定冇教你浪漫。」她笑我。
我把東西切完之後，基本上都是讓她做其他準備，下鍋炒和下調味料。
自己屋企始終都自己慣啲，下次你再煮返俾我食啦，她說。一言為定，我說。
她的手勢非常熟手，左右手都靈活得很，不用三兩下手勢就把菜完全炒好，而且菜式賣相都很不錯，正如她所說，我很久沒有食這種所謂住家飯，弄得我有點垂涎欲滴的感覺。結果吃起來，味道真的跟外表一樣無懈可擊。
「好好味...」我說。
「係呀，我個孫女真係唔錯㗎。」嫲嫲說。
「嫲嫲！」詩晴著她住口。
「做咩喎，男朋友仔都生得幾靚仔呀。」她說，我尷尬地笑。
「唔係男朋友呀，係補習老師！」詩晴臉都紅了。
「嫲嫲聽唔到啊，你話係寶貝呀...哦...呢啲稱呼唔使同嫲嫲講嘅，你哋後生仔留返自己啦，嘻。」她高興地笑着說。我也有點臉紅。
詩晴的嫲嫲很健談，也是一個歡樂的老人，感覺有點明白為甚麼晴可以如此堅強的快樂生活。她很疼愛這個唯一的家人，而這個唯一的家人也非常的疼愛她。即使有多難過，要不令老人家擔心，堅強也是唯一的途徑。
只是如果有一天，再也支撐不了，我願意再把我的肩膊借給她。
「今晚打攪晒。」我們邊說邊走去地鐵站，她堅持要送我。
「傻啦，你都有幫手煮飯同埋洗碗，而且一切都係我提議嘅。」
「多謝你。」
「今日你扮我哥哥，我都欠你一個人情。」
「又唔使，上次你嬲我嗰件事無數就得。」
「咁又唔得喎，上次係上次，今次係今次，你仲要滿足我兩個願望！」她輕佻帶點蠱惑的說。
「係啦，有件事我未同你講。」我說。
「嗯？」
「橙返咗嚟，係我喺沖繩返香港之後嘅事。」
「下！真嫁？點解咁大件事你而家先同我講！」她高興，然後有點裝着生氣的說。
「我同你講左嘅話，你今日一定會堅持浪費兩個鐘頭去我屋企補習。」
「咁樣又點會係浪費！嬲你呀！」她扁嘴。
我們走到地鐵站入閘機的前面。是分別的時候。
「Bye bye啦小妹妹，我哋下星期再見。」我說。
「Bye bye啦大哥哥，你記住要WhatsApp我嫁！」
「知啦長氣...」
「喂，點都好...有咩即刻搵我。」
嗯嗯，她甜笑著點頭。
我掐了一下她的臉蛋，轉身想要走向月台，卻又忍不著想回頭看一下她，她揮著手，跟我暫別。
這一晚，我真的很想把晴掛上我的幸福牆。
如果那面牆真的存在的話。如果我還能愛的話。