[高中][少甜]《如陽光伴我》: 二十九，你將一直掛在我的心內（中）

「係唔係類似『最美麗長髮未留在我手，我也開心飲過酒。』既意境？」我讀出林夕的歌詞。

「我唔鍾意呢句，點解最美麗嘅就一定要係長髮，唔可以係短髮！」她說出這句話的時候，看看自己那帶啡的短髮。

「喂，啱啱張相一定好核突，如果要貼既話快啲影多張。」我說，想要把她手中的相搶過來。

「影多張緊係得啦，但係呢張相我冇話俾你喎。」她坐在旁邊，把頭貼近我，然後「咔嚓」一聲又影了一張相。

她謹慎地搖着手中的即影即有，拉着我的手說：「過嚟啦，快啲同我一齊貼上牆！」



我走進她的房間，有一陣少女的幽香。房間基本構成的顏色就只有粉紅和白色。那張牆上的照片不少，她的朋友也不是一直只有小貓三四隻。

「轉校之前我有朋友嫁！」她笑著說，像能讀心一樣。
「轉校？」

「係啊，未同你講過老竇買左樓既。以前住喺香港仔嫁，舊時好多漁民都住嗰頭。所以你睇下好多張相都係喺香港仔屋企影嫁！不過老竇退休後就搬左去調景嶺。其實唔止我啦，嫲嫲都要識過曬班朋友嫁，不過佢順利過我姐。」她自嘲。

香港仔和調景嶺的分別對我而言只是名字，我想。

「你而家班同學...點解恰你？」


「好恰掛，傻更更咁。恰人可能係開心，俾人恰真係可以無原因嫁，特別係轉校生。」她傻笑。

「你好樂觀。」
「喊住生活唔使過咩，呢一年我學識左要好珍惜我仲擁有既野。」

「對唔住，我先前唔係有心唔搵你，只係我...」我說。

「我明啊，無事啦！我對唔住就真啦，無啦啦寫信俾你發脾氣...喂！好尷尬啊！唔準再提！」她臉紅地說。

「快啲貼埋張相要補習啦！我仲有唔夠半個月要考大考啦！」竟然是由她先提出要補習。



「點解無你男朋友？」牆上清一色是女生。
「係前男友啊，佢就想上我屋企！咸濕佬！」她有點生氣。

「…多謝你。」我很感激她那完全不合邏輯的信任。
「嗯嗯？」她聽不見。
「無野。」

她把我的那張醜陋的即影即有貼在床邊的那牆壁上，然後把合照遞給我。
「你唔好唔見呢張啊！」
「哦。」

「另一張就…吾，就咁啦，我放你喺薇薇、阿糖同埋曉敏身邊，有三個靚女陪你。佢地同我由小學開始玩到中四嫁！」她指著其他幾張照片說，晴也在她們當中，她笑得很甜，長相亦是最美。

「阿糖最癲，成日周圍跑黎跑去無時停，係一個運動建將，不過升左上中學之後就愈黎愈肥；至於曉敏…佢係中國舞公主，身體好柔軟，而且個樣好有中國風，先前都同你講過啦，我地成日為左陪佢全港18區都去過曬，不過一諗起去元朗個次就嬲啦…」她興奮地訴說著過去的一切，可想而知這些人對她的童年來說有多重要。



「仲有薇薇，而家已經係跳繩港隊啦！至於我都唔差嫁，你唔好睇我咁瘦，小學既時候有打排球，不過大個就無啦…喂，定係你覺得我好肥！」她雀躍地說著，要遠離那個她長大的地方肯定是一樣很困難的事。

「薇薇、阿糖、曉敏仲有阿晴。」我重複著。
「喂，你唔好諗住去香港仔溝我班好姐妹喎。」

「唔會，我連香港仔係邊到都唔知道。」
「你蝦佢地，我打死你嫁會！」她扁咀。

「但你肯定你想要貼我嗰張相喺間房？...我驚你發惡夢。」我說。