[高中][少甜]《如陽光伴我》: 二十八，主角和永遠的配角（中）

 
「足球隊輸左，我諗我幾時都得閒。我幫你問下佢地。」
「師兄萬歲！」

「係呢，你知唔知心如一陣去邊到比賽？」我問。
「唔知啊，好似係唔知邊間劇院定大會堂。」
範圍有夠闊的。

不知為甚麼，現在很想見一見她。又或者是聽到邦和傑的事，很怕又會在甚麼樣的關係又出些一些甚麼樣的亂子。我沒有示愛的想法，只是單純的想見她一面，向她送上祝賀。



我決定到元朗劇院那附近碰一碰，反正劇院和大會堂的位置很近。

花了大約15分鐘，從學校附近跑到元朗大會堂。
「唔該想問一陣呢度有冇音樂比賽，應該係拉小提琴嗰啲比賽？」
「啊，好似有啊。」櫃檯的姨姨說。
「一擊即中！咁請問大約幾點開始？」我喜出望外，興奮地問。

「唉...你等我check下...」櫃檯姨姨不耐煩的戴上老花眼鏡，仔細地看著，「星期日三點。」

「啊...咁一陣呢？一陣意思係今日。」


「冇喎...」櫃檯的姨姨說。

然後我走到去劇院，問相同的問題，得到相同的答案。
「咁你知唔知邊度有小提琴比賽？」
「今日啊...好似得香港大會堂有，同埋已經開始咗啦喎。」櫃檯的年輕Part-time說。
「好啊，唔該晒...」

天色變得昏黑，晴空已逝，現在才慢慢坐車去中環，也只會是徒勞無功。

「唉...算。可能係個天知道我地唔會有結果。」我自言自語。



一不小心走在路上撞到一個在用電話的長髮小女孩，她的身旁也有幾個差不多年紀的女生，其中一個穿著中國舞打扮，想必剛剛在大會堂表演完。

「睇路啦𡃁妹。」我說。
「大哥哥，唔好意思啊。不過我哋第一次嚟元朗，想食元朗B仔涼粉，你知唔知點去？」她問。

「嗰度啊。」我心情有點不爽，隨便指了一個錯的方向。
「唔該晒！」她笑起來很甜，讓我有一點內疚，倒也不可能馬上說出自己亂指。大概是這個原因，我還記得這件事。

無論如何，我決定要拿起電話，給心如發一個短訊。
 
「喂，聽講你哋Eng de入咗決賽，勁啦」
無禮貌。
 
「心如，聽講你地今日贏咗喎！恭喜晒！😛」


太熱情...
 
「hello, I heard u won wor, haha, good!!! 」
...如果是我收到的話，我也不知怎樣反應
 
「搞錯啊，贏咗都唔通知聲，嬲啊...」
像娘娘腔一樣...

心大心細。
 心如，我知你今日贏咗呀，我想同你示愛啊，但係我唔夠薑啊！我想這樣說

我把訊息輸入又刪除，刪除又輸入，最後決定把電話放回口袋裏。如果不想失去，最好的方法就是永遠不將那三隻字說出口。
「唉，算數！返屋企！」

我仰天長嘆，心中除了心如便是心如。


 
到我再跟心如有接觸的時候，已經是五月十五日，從伊利沙白體育館高高的看台上望下去，心如辯論比賽的決賽。
「估唔到咁多人。嘈交比賽有咩好睇，仲要用英文…我睇下數學比賽好過。」俊說。
「完左英文好似有中文。」我拿起場刊看著說，場刊上印有心如寫的感言，是英文，有點看不懂，大概是稱讚她那完美的教練吧。不想看。
「個食屎琳又話有VIP飛，而家坐山頂啊大佬…」邦說。傑沒有來。
「喂！你唔好咁過份咁樣話我好姐妹喎！」雯輕力打他。
 
比賽開始，辯論的題目是「The government should ban dredge fishing」，意思大概是討論政府是否應該立法禁止拖網捕魚，討論漁業…我對這個行業一無所知，這樣題目就算讓我用中文我也不知道應該說些甚麼，更何況是英文。心如的位置是Captain of affirmative team，好像是要先發言，然後再總結，至於琳就有份參與台下發言的環節。這是我第一次看這種比賽，除了完全看不懂外，感覺還不錯。至於邦和俊對如和琳也算很支持，因為除了她們在發言時，其他時間他們兩個都在玩Puzzle and Dragons。