[高中][少甜]《如陽光伴我》: 二十六，那麼瘋癲過那麼珍惜過（上）
教練訓誡完，我沖完身走出去看台的時候，邦已經在跟雯調情，其他隊員也各自找了特地來支持自己的朋友聊聊天，會來星期六到離學校這麼遠的球場看比賽，肯定是很忠實的朋友和粉絲。傑則在看台下跟其他沒太多觀眾捧場的隊友慶祝。
「乞嗤！」好像有點感冒，我嚓嚓鼻水，走向邦的那個方向。
「你見唔見到頭先我入嗰球？」邦興高釆列的指手劃腳，吹噓著自己的貢獻。
「見到，致勝球喎，點會見你唔到啊。」雯好像對邦這一套也很受落。
「好勁喎你。」我加把咀。
「傑呢？唔過嚟既？」雯有點關心的問。
「唔知呢，唔想阻住你兩個掛…」我說，邦把手上的Bonaqua水樽擲向我。
「走啦你，唔拿係約左人咩你？」邦說。
我看一看手機，三時多了。
糟糕！遲到！完全沒了這回事。
我拔腳就想跑，雯問：「你又去邊啊？大忙人心如都嚟左捧場喎，唔打聲招呼先？」
「下？」
心如徐徐從後台的女廁走回看台，我呆了的看著她。
「我係唔係miss左咩呢？」她笑著說，隠約有點不舒服的感覺。
「啊…我諗住搵你，見遲大到，咁大獲…點知原來你嚟左！」
「係啊佢今日嚟左！」雯望著如笑笑說，如向她做了一個鬼臉。
「我有問雯你地踢成點嫁！佢話遲左開始，我練琴又早左完，咁我未過嚟球場睇囉，剩係睇到最尾十分鐘喳，喂！你頭先好型喎！」她笑著稱讚我。
「你唔好笑我啦，你唔講我都唔記得自己有落場。」
「咩啊…最尾個…」
「角球。」我說。
「係角球！個角球係你博返嚟，又係你開，我識睇嫁，都有份打氣！唔係嚟白撞嫁！」她得意洋洋的說。
「多謝你嚟睇…」
「快啲行啦仲講！又話請我食飯！」她說。
原來那把聲音…不是我聽錯。
剛才她真的在。
我們從運動場離開，走向輕鐵站的方向。
「等等！其實咁早都未肚餓，不如去睇戲！」她突然捉著我的手臂說。
「都好，反正呢排我有套戲想睇…」我說。
「我都有想睇啊，你想睇邊套啊？」她問我。
「你呢？」我想先聽她想看那一套，免得她因為我所說的不同而不敢說自己想看那部戲，因為換了我也會這樣。
「嗯…咁不如一齊講，我數三聲，三、二、一…」
「《春嬌與志明》。」我說。
「《魔鏡魔鏡》！」她說。
我們相視而笑。
「咁不如睇《魔鏡魔鏡》，我都想睇！」我附和她。
「點會喎！你啱啱先話想睇另一套！一係我哋去睇吓邊套時間啱就睇邊套？」
我們從天水圍公園走向就在附近的銀座商場，那邊有一個小型電影院，有時候我也喜歡和傑他們來看電影。
「場次全部都差唔多...兩套都係差唔多開場...睇邊套好呢？」心如有點迷惘的說。
「睇晒兩套啦！完咗都係八點到姐！」我說。
「都好喎。或者睇完一套睇吓肚餓未。」
我們買了兩張《春嬌與志明》的戲票，就馬上趕至播映電影的五號院，讓查票員檢查學生證後，我小心翼翼的收起票尾，放在銀包的最深處。
心如說有點怕黑，坐在比較接近走廊的左手邊。開場前她回了幾個訊息，感覺她刻意想把電話藏起來避開我的目光，我想是Jayden吧，然後就把電話關掉，放進口袋。
電影的內容我已經完全忘記，整套電影我也無法專心去看，雖然笑聲不絕，但我只是一邊裝着認真，一邊偷看著身邊的心如。
突然她別過頭來，我嚇得馬上把頭轉回螢光幕。
「我有啲凍啊...」她拉一拉我的衣袖，壓低聲線說。
「啊...」我打開背囊，背囊內只有一些雜物以及剛才那件沾滿汗水完全濕透，發臭的球衣。真是太失敗了。
「你等我一陣！」我說，然後烏低身走出電影院，跑向小食站。
「唔該！唔該！想問有冇毛氈？」我問。
「啊...理論上就應該係有嘅...」站在小食站的售貨員慢條斯理地說。
「咁唔該我想借一塊！」
「理論上係要比50蚊按金。」
「我有！」我從銀包掏出一張五百元。
「但係實際上呢，我哋已經借晒出去。」
「...屌。」
我無語問蒼天，馬上跑離戲院，到旁邊的商店，隨便挑了一件較厚的天藍色衛衣拉鏈外套。花了大約5分鐘排隊結帳。
「先生，唔好意思，呢件無碼喎。」女店員說。
「咩叫有碼無碼啊...我要而家拎住呢件啊！」我急燥地說。
「我知，但係呢件係陳列品，非賣品嚟嫁，先生」
「喂，我喺衣架拎嫁！」
「係唔係左邊嘅衣架？」
「咁又點啊？」
「鋪頭左邊係陳列品，右邊先係可以賣嘅貨品。」
「食屎啦你，咁你又唔寫清楚！」
「先生請你自重，唔好講粗口！」
我馬上跑去右邊，拿了另一件深藍色的衛衣外套，直接跑向收銀處。
「呢到、呢到，唔該、唔該！」
「喂，排隊啦，咁無禮拜嫁！」後面一個在排隊的人鼓燥。
「我頭先排左5分鐘啦。」
「係啊係啊，我阿媽三十年前係到排緊啦。」另一個人說。
「喂，你同我做證，我頭先真係排左好耐...」我向店員說。
「我對天發誓，從來無見過你。」店員否認。
「我...」
結賬後馬上又奔回戲院內。
「等等，先生，你張戲飛呢？」小食店的售貨員叫停我。
「你啱啱先見我行出嚟㗎喎？」我反問。
「係咩？」他再反問。
「...」我痛苦地從銀包的最深處，掏出票尾向那個人展示後，連忙跑回五號院。
「喂，傻仔，你去咗邊呀？」如在漆黑中輕聲問道。
「啊，個肚有啲唔舒服。」我說：「係呀，我有件褸，你睇下嬲住佢會唔會暖啲？」我向她傳向我那全新的藍色衛衣外套。
「唔該曬啊...好彩你有帶褸。」她感激地說。
嗯，其實我沒有帶。