[高中][少甜]《如陽光伴我》: 十二，海邊的卡夫卡
心如第一次來陽光補習社是第四次的聚會。
「大家好，我係黎心如。」她點點頭，對我們說。
「心如姐姐！」琳沖過去抱著心如，她們是在英文辯論隊的師姐妹。
「乖豬。好耐無見啦...最近呢兩個星期唔使比賽。」心如興奮地說。她們雖然不同級，但比賽關係，平常大概一、兩天就會見一次面。
「係時候開始。今日我地會一齊分享村上既《海邊的卡夫卡》。」我說。
「有邊個未睇嫁？」傑問。
「不如問有邊個睇左...」邦托著頭說。
只有我和心如舉手，其他五個人呆呆的看著我們。
「田村卡夫卡未必係世界上最堅強既15歲少年，不過肯定係最中二病。自己幻想一個叫烏鴉既人做自己朋友... 講真，比起田村卡夫卡，我更加鐘意中田老伯既故事，我覺得作者想用中田既怪病去突顯戰爭既可恨。」我說。
為了這一天，我一星期內看了這本書三遍，連同幾本村上其他的名著。
「你真係有睇嫁喎！」如以欣賞的眼神看著我：「呢本書我兩年前睇過，今個星期我都有睇多一次！我好鐘意櫻花呢個角色，卡夫卡由細到大都無感受過愛，但係櫻花無條件咁好照顧佢，佢地仲...」
心如提起故事中比較有關性的情節，臉一紅，很是可愛。當然這件事只有我留意得到，因為其他人都沒看書，根本不知道誰是「櫻花」。
「不如你兩個自己開第二個會啦...」邦皺著眉說。我和心如相視而笑。
「你地自己唔睇姐...」我反擊，倒是心中卻滿是溫馨。中學時期的幸福就是，身邊的人拿你和你暗地喜歡很久的人開玩笑。
「咁落去唔係辦法，呢個活動好似太過高門檻，中學生邊有咁多時間睇書，仲要係咁文學性既書...上次明明多左人，今日又少返。」雯分析著。琳和傑對雯的分析表示認同。
「不如星期四都轉埋做補習，反正我地個名本來就叫陽光課後補習學會。」邦說。
「唔得…」我說，「我地本來開始搞既時候就諗住係要做文化活動，而且我叫Katrina參加既時候都講好左係會好似而家咁。」
「咁樣點樣搞落去呢？你唔好咁㒼塞啦。」邦大聲地說。氣氛變得有點緊張。
「冷靜！雙方都有道理，搞讀書會長遠係一個好好既概念，不過而家的確有好多實質既問題。我覺得我地可以吸引多啲慣常會來既人，之後暑假再搞返類似既活動。」如說。
「不過...」我想起對她的承諾。
「不過你就差我一次亦舒讀書會啦！要還嫁！」她笑著，用溫柔的聲線對我說，我真的完全無法抵擋她的笑容。
「Katrina真係Katrina，連固執大王都搞得掂。」邦說。我用「我發誓如果你再講落去，我一定會打獲你」的眼神看著他。
就這樣，會面提早的結束了。離小提琴班還有大約一個小時的時間，其他人離開後，心如還留了在我們的班房。我也以想溫習的原因留下，邦和傑知道真正原因，自然也沒留難，能和雯一起走，邦這小惡魔怎會管其他事。
「辛苦曬啦！」我對心如點點頭。
「唔辛苦啊，我覺得好開心，可以有知音人。」
「知音人？」
「係啊你啊！唔係好多人會睇過呢啲書。」
雖然當初看的時候的確是為了想她對我另眼雙看，現在看來，我的確是有點喜歡這些書了，想把這些作家的書全都看光。
「其實我都係因為呢個活動所以先會睇多啲，但睇睇下幾鐘意，睇書個人會好舒服。喺呢個世界，讀書要同人鬥、搵工、比賽樣樣要同人鬥，睇書好似係惟一一樣唔使同人鬥既野。」
「我明啊。好似永遠都透唔到氣咁。」她說。
「但你永遠都係第一名。」
「喺呢到既第一名，咁外面既世界呢？可能頭一億位都唔係，但所有人永遠都覺得你應該可以再好再進步，再努力、再下一城...就好似我永遠都比唔上我哥哥咁。」她把玩手上的擦膠，說：「有時我好羨慕你地，柴娃娃鐘意做咩就做咩，無密則則既行程、唔使開會學琴表演比賽，剩係做自己想做既野。」
「你而家都可以，同我地一齊頹下，可以咩都唔使諗。有時想做就去做都係一種開心。唔可以灰嫁，你睇下，塊白板俾你搞到變到黑蚊蚊！」我指著黑板說。
「你好無聊！」她咀角向上彎，露出傻傻的笑容。
「16歲唔無聊唔通26歲先無聊咩。」
「你估下26歲既我地會做緊咩？」
「你應該係全世界最出名既醫生，又可能係律師，放工就係世界級既演奏家。我就係一個無人識既小說家。」我說。
「點解我唔可以係小說家？」她鼓氣地說。
「因為醫學界同法律界都需要你。」
「咁點解小說界唔需要？」
「…因為小說界有我！歷史上第一個無人睇既小說家！」我想了想說。
「我會做你惟一一個讀者，所以唔好意思啦！你破唔到紀錄！」她說。
然後她望向窗外。
「我嗰日見到你...你見到我喊。」
「咁你係咪要殺人滅口？」我哄她。
「今年係最後一年，我覺得輸左嘅話對唔住隊友。下學期如果再入唔到決賽既話，屋企人同埋Jayden教練都應該會殺左我。又可能係咁影響左我比賽既表現，我唔知，最近好多事發生，加埋加埋搞到我分左心。」
「你好似好驚你教練…仲有屋企人？」
「可能係咁。其實我覺得佢地全部都好叻，講咩都好啱，但我好無用，永遠都達唔到佢地既標準咁。就好似Debate咁，好似永遠都只係會令教練失望。」她灰心地說。
「呢種事我可以但又好似唔可以理解。輸左比賽就唔可以再同戰友博盡、訓練，都唔會好似比賽時咁成日見面。輸呢樣野係喺我地足球隊成日發生，的確係好傷心下。但我就唔係太在意自己既教練，佢係一個叫何sir的肥佬。你口中既教練，你好似好在意佢講既野？」我說。
「可能係啦，唔想令佢失望。都唔想令其他隊友失望。」
「喂，你唔係得你一個嫁，喺校隊有你既隊友，喺呢到有我地。就算結果係點，都唔會係你自己一個既責任，你記住呢樣野。」
「不過…」她好像有點疑慮。
「不過，你係唔係鐘意你教練呢？」我半開玩笑的問，其實心底很想她給予一個否定的答案。
「唔係掛？我由細到大都無諗過呢種事。」她說，「屋企人知道我咁早就諗拍拖既話一定會打死我。」
「鍾意未開口講囉，你咁好嘅女仔，我諗唔到有任何理由佢會拒絕你...」
「唔係啦！我唔知咩叫鐘意咩叫愛，我無試過鐘意人…而且教練已經有女朋友嫁啦，同佢一樣都係喺港大讀LLB。我覺得我冇一樣嘢比得上。」說的應該是那天我看到的那個女生。
「或者係，或者唔係。我唔識佢哋，我都冇拍過拖...不過我覺得一唔一齊、鍾唔鍾意，唔係睇客觀條件有幾好，其實都只係講感覺。就算條件有差距又點，心靈上的嘅距離先係最重要。愛可能只係一瞬間嘅感覺，呢樣野好直觀，係就係、唔係就唔係，無人比你更清楚，都無人比佢更清楚。」
「呢種事聽起來好難理解。」她說。
雖然她沒有說自己喜歡Jayden，但我想現實大概就是這樣，這種人，誰都喜歡，他和心如兩個完美的化身就像是天生一對般。只是妳最好應該是喜歡我，因為我不會讓你難過，一刻都不會，我想說。
「如果愛情係容易理解嘅話，世界上難過嘅人會少咗大概96%。」
「你講嘢真係有小說家風範！」她笑了。
「仲要係冇人睇嗰種。」我說。
「至少還有我。」
我向她遞上用唐老鴨盒子裝着的朱古力。她最喜歡唐老鴨，我從Instagram得知。
「我今日食剩㗎。精神科醫生話朱古力有血清素，食完會開心啲。」我說。
「你要睇精神科醫生？」她有點驚訝的問。
「唔係，我睇都市閒情學。」
「點解隻唐老鴨好似咁奇怪？好似翻版，自己畫上去咁...不過好搞笑！」她拿起盒子仔細看，忍不住對着它笑，然後取出一粒朱古力吃。
因為真的是我自己畫的，盒子也是我自己做的（朱古力是買的，我不想她食物中毒）。當然我不會告訴她。明眼人一看就會知道的事，她倒好像完全不察覺一樣。
「可能真係翻版，聽講而家有啲便利店會賣老翻。」我說。
「有咩可能喎，唔會俾海關拉咩？」
「海關根本都認唔到呢隻係唐老鴨。」
「我可唔可以要曬成盒，連埋個盒。隻傻鴨真係好搞笑...」
「可以啊，我本來就覺得好核突...買嚟都係想食朱古力。」
「多謝你啊！」她燦爛的微笑着，大眼睛都變成一條線。
「開心就好。」
你開心就好。我想。
和她在學校門外告別，我一個人想了很多無結論的事。主要圍繞和如的關係、未來，還有她說的話，我最在意的是她和Jayden的關係。比起她的教練，到底我有甚麼更優勝的地方…想不到。還是算了。這些事愈想愈無謂。