[高中][少甜]《如陽光伴我》: 六，陽光補習社

 
回首看起來，高中是一瓶酒，公開試大概是拔開木塞後馬上湧上來那些酸酸的氣味，但當靜下來細心等待、品嘗，更重要的是那些酸味的背後到底是甜是回甘，還是苦澀無味。這一切一切都取決於中五的十月。
 
你可以選社幹事、學生會，做學校的風頭躉，低年級的學妹有可能會因此崇拜你。可以進校隊，一班人為了一個對將來幾乎人生完全沒有用處的獎杯拼了命、血和汗，贏了便覺得贏盡全世界，輸了大概會頹廢幾個月、在社交網站寫幾篇潮文，以讚好洗滌心靈、重新振作。
 
又或者想令中六和往後的日子不要太難過，提早發奮圖強，在家中桌上的水松版釘上從港大、中大開放日拿到手的貼紙，然後以自己完全不知道是讀甚麼的社會科學系作目標。
 
當然最大群的人是我這種，在學校沒有存在感、在校隊沒有價值、讀書又只是得過且過的人。即使高中未完結，就知道這段時光根本沒有任何回頭細看的價值。
 
我本來是這樣認為的。


 
「上個月又話要搵d校隊學會玩下溝下女...」邦抱怨，「十月啦！」
 
「我地未足球校隊囉，不知幾型啊。」傑回答。傑是足球隊的王牌，我和邦充其量也只是校隊內的蘇斯克查，後備還好，放在正選會死的那種。
 
「你照下鏡啦，足球隊？先唔好計我地係大後備，你睇下人地籃球隊喺學校練，排球隊就成班女一齊練，我地隊波棍撞棍都算啦，去到鬼咁遠做訓練，邊個知啊？」邦生氣地說。
 
「咁你想點？莫非閣下有咩技能係我唔知嘅？」我問。
 
「就係等你問呢句。我地唔係無才能，只係其他人睇唔到，我地只要有一個平台，想喺學校成名做風頭躉？我驚你到時覆師妹WhatsApp覆到手軟。」


 
我無意見。反正我心中只有一個無論我多出名她都不會在意的人。
 
「咁到底係咩？」傑問。
 
邦著我們靠近他，說：「喺班房搞一個補習社，放學一齊溫書，逢星期二就會一齊聚腳交流讀書心得，星期四就做d文化分享，例如睇電影、睇書、聽音樂。咁益智，學校實會俾我地搞！」
 
我搖搖頭，說：「讀書咁無聊，有咩人會參加啊？就算有人都只係同我地一樣嘅大毒男。」
 
傑也覺得這建議匪夷所思：「第一，我地三個無人考過上全級頭十。你話要搞文化日，大佬啊，我上套睇嘅戲係新世紀福音戰士，睇嘅書係全職獵人嘅上一本單行本。」


 
「咁都真係好耐之前下… 我係Iron Man同埋Q版特工。」我笑著和應。
 
「你地冷靜聽我講，我地學校唔係個個學生妹都會玩課外活動，但十個有著十一個都會補習。我地中五，教低form有幾難姐？咁都唔識教，你地仲話想入大學？」，邦說得開始有點忘形：「至於點解要有文化分享，係想吸引一d更高水平嘅人入會，我地無能力，佢地有未得囉！有明星級嘅人自然就會有大把人排隊參加啦！」
 
說到學校明星級的人，老實說其實大家都只會想到同一個。傑和邦不若而同地看著我。
 
「下其實我同佢唔係好熟...」我難為的說。
「下唔熟？全校最熟Katrina係你啦... 你一晚睇佢幾多次ig，個個post都識背，最熟仲唔係你？」傑恥笑我。
「拿，而家俾個機會你，又可以喺學校出名，又可以抱得美人歸，食屎定食飯睇呢鋪！」我從沒見過邦的眼神這樣堅定。
「我試下啦咁...」
「就咁話啦，一陣完左trainning網吧等，陽光、藍天、陣地邊間都好。」邦說。
 
他們繼續前往球場做訓練，我着他們替我告假一天（事實上不告假也可以，校隊內真的沒有人在意和記得我），我則回學校找心如。
 


放課後的五時正，如果她沒有去表演或做訓練的話，要麼就在一樓的音樂室練琴，要麼就在二樓的課室做辯論訓練。
 
一樓的音樂室有點吵耳，有些5A、B班的人在夾Band，大概想在年尾的歌唱比賽大展拳腳，「請你別說話、別說話、別破壞這刻優雅…臨走你別說一聲好嘛、你也不必怕...」，流曲的樂曲配上一把很難聽的歌聲，這種歌聲誰也不可能感動吧。倒是請你別說話也應該是大家的心聲。
 
不在這，心如應該在二樓吧。我快步走上去，看到她，和她的教練。那個叫Jayden的教練長得很高、也非常俊美，聽說A-level考了4A，港大法律系三年級，住在數碼港（其實我不知道在那裡），也是大學代表隊。簡單說就是和心如一樣的人生贏家。不知道學校到底花了多少錢才能把他請回來，只是他看來哄得心如笑得很開心。郎才女貌。
 
「啊..Katrina?」我有點不好意思打斷，事實我也不知道應該說甚麼。
「嗯？」她笑著轉過頭來，看著我的笑容依舊甜得無可動搖。
「咁啱嘅...」我有點後悔跑來前沒想過說詞。

「做咩啊？想教我M2？」她想起今天的事，又掩口笑了起來。
「唔好笑…其實係，我同兩個friend想搞一個又會讀書又會娛樂嘅學會。」
「係做咩嫁？」心如擠著眉笑著，覺得有趣的看着我。
 
「我地一星期會見兩次，星期二係補習班，雖然話係補習，但想做嘅主要係交流下意見，星期四係...文化日？我諗會睇戲，或者做d讀書分享。」我自己也不太確定的說。


 
「睇書？例如咩作者…？」心如覺得有點難以置信，事實上我也是。
 
「無錯，例如…」說起這種事，我腦內一片空白，我想起在高登寫《東莞的森林》成名的向西村上春樹：「我最愛嘅村上春樹！」
 
「好似幾吸引喎！我估唔到除左debate team，喺我地學校會有呢類文化活動。」心如雙眼發光，看來我成功吸引了她的興趣，她續說：「咁呢個星期你地會搵邊本書做主題啊？」
 
快露馬腳了。我想起達哥於電視節目上的分享。
 
「係太宰治嘅人間失格，雖然我真係好想做村上嘅題目，但係為左就下阿邦，佢對於呢本書好有興趣。」我吞吞口水，舉起左手兩隻手指說：「懦夫，連幸福都怕，碰到棉花都會受傷。」
 
「你真係有睇…」心如看起來對我有點改觀，老實說我自己聽起來也擲地有聲。
「我想參加！」她想也不想就答應了。
「你確定？」
 


她想了想，說：「補習班要睇情況，文化日就...太宰治我去唔到，不過之後嘅村上春樹我可以啊！同埋可唔可以做一次亦舒啊？我一直都好想做一次咁嘅讀書會。」
 
「緊係可以！不過你真係有時間？」心如面色一沉，我意識到自己似乎又問了錯誤的問題。
「有啊...本身預左時間準備比賽，不過今年喺比賽初期就輸左，所以上學期多左一啲時間...」
 
心如扁扁咀，別過頭看著她教練。教練摸摸她的頭，她咪起眼讓他安慰。我看起來像多餘的一個人（事實也是）。
 
「咁我走先啦...唔阻你地。」我也只能這樣說。
「係呢，咁到底你地個會叫咩名？」
 
我想起邦剛才隨口說的一堆網吧名字。
「陽光...補習社。」