《106與她的邂逅》: 番外篇 農曆七月
睇完5集《106與她的邂逅》你可能會問：「呢個故事關106號巴士線咩事？」
-
我會答你：「與『人』相遇嘅緣份唔係只局限於106號巴士線，可能會喺茶餐廳，亦都有可能會喺警署。」
-
我係Rachel，請大家多多指教。
-
我同呀一誤闖陰間已經過咗四個月。盂蘭節又嚟喇，唔知呢幾日又有冇靈異事件發生呢？我嘅家人因為想遠離煩囂，搬咗去坪洲嘅小島居住。坪洲一向都有盂蘭勝會活動，讓遊魂野鬼「重獲新生」，畀一個地方佢哋居住。坪洲居民每年都會喺農曆七月十二至七月十五喺大街進行祭祀嘅儀式，街坊可以拜神，捐大樹王腳底（意思係祝願平安），燒街衣都可以喺大街嗰度燒。
-
農曆七月十三日晚上，平時唔迷信嘅我竟然喺街市買咗疊金銀衣紙燒街衣。話曬之前同呀一經歷過一段驚險嘅「地府之旅」，燒一燒，保平安吖嘛。呀媽好好奇咁問：「你鬼上身呀，冇啦啦去燒街衣，小心比呀sir塌你返差館呀！」
-
娘親爆seed，不過佢又講得啱嘅，香港警察，知法犯法呀嘛。
-
八點鐘嘅坪洲，一直沿海皮行，唔少食飽飯落嚟散步嘅老人家都摸住個大肚腩。
-
「唔係咁邪吓話？」一陣怪風吹過，民賤聯掛嘅banner被吹落海，落葉圍住圈氹氹轉。唔理咁多，行快兩步，去做啲對得住神靈鬼魂嘅事。
-
「Holy shhhh！」萬事俱備，只欠火機，本人強烈譴責自己作出一連串嘅不合作運動。我喺袋入面摷到枝雷射「槍」，但係照咗啲街衣超過10秒都冇着火，或許街衣啲油墨唔係黑色，吸唔到光。
-
有個呀婆見我咁陰功，借咗個火機比我，火機唔使5秒就點着咗啲祭品。
-
「大樹伯伯祝我出入平安，唔好比警察拉我。」我好虔誠有心咁拜神，大樹伯伯應該會聽到嘅。
-
夜闌人靜，係時候要返屋企。由於部雙數𨋢壞咗，住喺14樓嘅我要搭單數𨋢去13樓再行多層樓梯先返到屋企。等咗好耐，終於都有𨋢。
-
「ddu du ddu du請小心𨋢門關閉 往上going up」升降機全速向上，入面嘅抽風系統比平時凍咗好多，令我透心涼。話明係單數𨋢，部𨋢理論上只會停單數樓層，但係部𨋢去到12樓同13樓之間停低。
-
突然，一把冚家鏟嘅聲音喺喇叭出聲：「12.6969樓 請小心𨋢門開啟」話口未完，𨋢門已經發出「咦嘢咦嘢」嘅怪聲，𨋢門嘅罅漸漸射入光芒。
-
我企喺𨋢掣隔離，打晒冷震咁探頭出嚟望吓出面咩環境。一個男人走入𨋢，而我望到出面嘅地下佈滿溪錢，條路嘅盡頭除咗強光之外咩都冇。我見冇「人」入就即刻撳掣閂門，即使撳得好大力同撳多幾次制，道門都係用同樣速度關閉。
-
「究竟呢度係咩地方？」Errr.I can't find the right word.
「先生請問......」我擰轉頭諗住問頭先入𨋢嘅男人，竟然嗰個男人消失咗！明明部𨋢得一個出口，個男人走咗去邊？升降機變返正常，去到十三樓，我提心吊膽行上去14樓，返到屋企當咩都冇事發生。
-
「枱面有碗湯呀，趁熱飲吖！」娘親返入房瞓覺。成個人凍冰冰飲啖熱湯冷靜吓先。反正都瞓唔著，我開咗Netflix睇天光。
-
農暦七月十四-盂蘭節正日。
-
人類總係犯賤嘅，有得瞓就唔瞓，朝早又眼瞓到死。時光荏苒，喺農曆七月十四hea吓hea吓已經到咗下午茶時間。我喺屋企播下容祖兒演唱會，葡萄吓人哋有錢睇現場。橫掂都係，我po 咗 Instagram 限時動態「好想睇Joey演唱會呀」，廢事比人話畀鬼捉走咗 。
-
「情人不愛你還不愛你憑甚麼否定你，月光...」
-
正當我聽得hihi之際，有個電話打嚟。無錯，係呢個人。
-
「今晚睇唔睇容祖兒演唱會，我有免費飛呀！」
-
「睇呀！」
-
「今晚見！」
-
「好呀」
-
令人期待嘅時刻總係一波三折。出到香港，我上咗架冇人排隊兼冇乘客，得司機一個嘅101巴士去紅磡。我求其坐喺近落車門嘅位置，見到一個坐喺半架輪椅，個身有一半喺車外面嘅「人」喺輪椅位旁邊。我捽捽眼，睇住佢穿過車窗，然後從此消失，架車一直慢慢咁行。
-
我不斷麻醉自己，眼花啫，冇嘢嘅，我一定要順利到達呀，架車到未呀，又係紅隧，全架車只得我同司機就咁過隧道。
「從來未知會有限期 重遊著一起的故地」
-
從來冇諗過，呢個與「人」同「人」嘅緣份竟然喺農曆七月十四再次遇上咗。我之後究竟會點呢？我弱小嘅心靈會唔會再次受創？
-
「咦！乜又係你呀，呀一！又會喺紅隧見到你嘅？唔通今次我哋兩個又落地府？」
-
「鬼故並非精密科學，以上內容只供故事重點。你看過的鬼故可能不相信其真偽，但面對社會警權濫暴，你能分辨黑白嗎？期望你是有良知的讀者。」Rachel的小文筆。
-
《106與她的邂逅-番外篇完》
-
IG：chingchingstory