是咁的，照顧過我嘅護士死咗: 三百八十、信

大家姐走去櫃臺，喺英式木櫃筒中拎出要交畀我嘅野。

「佢嘅喪禮係幾時⋯⋯」

「下星期，時間地點我再wtsapp你。」

我接過大家姐手中嘅信封，未拆封過。

上面寫住：「給偽毒金！」





「嗰日我去拎林林幫我訂嘅雕刻用品已經發現封信。我費事班差佬睇，所以收埋咗。我諗得你先有資格開依封信。」

我望住林林嘅字跡，眼眶已經紅咗。但大家姐眉毛都無跳一下。

「你⋯⋯真係堅強⋯⋯」

大家姐冷笑一聲：「我喊夠喊飽架，咪以為我真係咁硬淨先得架。喊完，咪起返身繼續行。」

「⋯⋯所以我話你堅強⋯⋯我⋯⋯仲未起到身⋯⋯」





「你係要多啲時間架喇，鬼叫你係最愛佢嗰個咩。」

我唔好意思咁耷低頭，拆開林林畀我嘅第一封，亦係最後一封信。

「唔阻你睇信，我去點貨先。」大家姐行入內室，我將摺成長方形嘅信紙打開，同時聽到內室傳嚟嘅低泣聲。