是咁的，照顧過我嘅護士死咗: 三百七十九、大家姐水煙壺店
我依照大家姐畀我嘅地址去到佢位於太子一棟舊樓嘅樓上店。
木質嘅大門，一入到去就瀰漫水果嘅香味。原來大家姐正職係賣水煙壼。
「以前唔係架，後尾林林勸我搞啲小生意，反正老豆老母有錢，我咪打發下時間。」
大家姐嘅小店左右排咗一列櫃，櫃上有大大細細、各有特色嘅水煙壺，聽講有啲仲係大家姐自己設計。
大家姐曾經同林林反過面，當時林林決定讀返書，唔再跟大家姐。但後來林林都係返咗去佢身邊，夾硬逼佢戒毒。
戒完毒之後，佢地又少咗聯絡，林林話大家姐爛蒲嘅個性唔啱佢。
不過當佢唔開心又會搵大家姐訴苦，所以大家姐對林林，可以話又愛又恨。
之所以會恨，係因為實際上，大家姐真心想同林林做最親嘅閨蜜，可惜對方話大家唔夾。
「唔好意思呀，咁耐先搵你。之前忙住應付啲差佬，講幾多次都死唔信林林無滑雪，搞咗好耐。之後又要準備林林嘅喪禮，所以依家先得閒叫你嚟。」
亦因為大家姐心底其實好重視依個朋友，先會將佢嘅喪禮摟哂上身負責。