是咁的，照顧過我嘅護士死咗: 三百七十七、靜夜

嗰晚，十八子陪我留到好夜，九點放工嘅佢聽日要返七點，但都陪我，仲送埋我返屋企。

媽媽見到我，摟住我話好擔心，同埋唔該十八子送我返屋企。

「你今晚喺度過夜啦，費事你又返去少咗時間休息呀。依度近醫院多啲，你可以瞓晏啲。」

「麻煩你喇伯母。」

「唔麻煩，我都當你半個女咁架啦。去沖涼先啦。」



我拖住疲憊嘅身體瞓上床，十八子去咗沖涼，花灑嘅水聲沙喇沙喇咁響起。

媽媽坐喺床邊。

「十八子講咗我聽喇。」

溫暖嘅手放喺我額頭：「你媽媽我未試過面對一個我好愛好愛嘅人離開，你爺爺係佢離開咗我先愛，你老豆喺離開之前我已經唔愛佢。」

一下一下撫摸我額前嘅頭髮。



「我未經歷過，但我可以想像。而且親眼睇住自己愛嘅人受苦，我諗嗰陣痛都差唔多⋯⋯好似⋯⋯好似全身每一塊骨頭，每秒鐘都會斷一次咁。」

有溫度嘅水點滴喺我面上，媽媽幫我抹走。

「好好瞓一覺啦，仔。早唞。」

罕見咁，媽媽錫咗我一啖。我嘅意識亦漸漸遠去。