是咁的，照顧過我嘅護士死咗: 三百六十、再救多一個

「嫲嫲走咗之後我就一直喺彩虹橋等佢。成個故事，就係咁喇。」

林林挨喺欄杆，微風撥弄佢嘅頭髮。佢無望我，抬頭向天，睇嚟仲等緊夜空嘅星星。

可惜仍然都係黑色一片。

聽完林林嘅過去，我頓時明白點解佢會鴨片返工，點解會將自己嘅食飯時間縮短，點解捱到暈低都唔想請假休息⋯⋯

就算明知世界嘅運作法則係救得一個就救唔到第二個，佢都希望救哂所有人。





去少幾次廁所、壓縮食飯時間，以最快嘅速度返去照顧病人。

因為佢知道，喺醫院，就算係區區一分鐘都可能係生死之別。

如果可以的話，林林一定連片都唔換，飯都唔食，喺自己返緊工嗰陣嘅時間全部貢獻畀病人。

「我只係想再快啲、幫多一個、再幫多一個、再多一個。」

當病人愈嚟愈多，林林就再進一步壓縮自己作為人類所需要嘅基本活動時間。





由少飲水少去廁所，到鴨片返工，再進化成鴨片又少飲水。

由一個鐘食飯時間，到半個鐘、十五分鐘、五分鐘，有時候甚至唔食。

由準時收工到OT，再由準時返工到提早返工。

再快多一分鐘、再做多一分鐘。

再快多三十秒、多做多三十秒。





林林只係想，再幫多一個病人，再救多一個病人。

佢唔想再有人，會遇到同佢一樣，眼白白睇住重要嘅人因為延誤就醫而離開。

佢比任何人都清楚依種痛，所以先唔希望再有人同佢一樣。

依刻，望住林林嘅我，有行前一步，摟住佢嘅衝動。