是咁的，照顧過我嘅護士死咗: 三百五十九、五分鐘

「咳咳咳！」緊接落嚟，係嫲嫲嘅咳嗽聲。

「嫲嫲！你點呀？做咩事？」

嫲嫲咳到成個人好似條被丟上岸嘅魚咁，血將氧氣罩染成紅色。

「點⋯⋯點會咁架？」林林完全慌哂手腳，幾秒後先有反應，即刻伸手去㩒鐘通知姑娘。

一下、兩下、三下、四下、五下、六七八九十十一十二十三十四⋯⋯





「快啲呀⋯⋯快啲搵人嚟！」

林林㩒咗好多下鐘都無反應，佢見嫲嫲用力咳咗一下，就無再咳，睇嚟係血水卡住咗喺喉嚨。

膚色慢慢因缺氧而泛紫。

林林即刻起身大叫：「救命呀！有無人呀！醫生！姑娘！」佢一路叫一路想衝出病房，但走廊嘅病床同病人令佢要左避右避無得直線跑出去。

「救命呀！有無姑娘呀！」





終於去到走廊，見到前面唔遠有護士，林林大聲求救。

護士轉身，一聽到就馬上跑入病房，喺加開嘅病床左穿右插，唔使三十秒就趕到全身發紫嘅嫲嫲身邊，即時同佢急救。

前前後後，其實只係唔到五分鐘時間。

只係唔到五分鐘，對一個患癌嘅虛弱老人家嚟講，窒息咁短時間已經足以致命。

護士對紫黑色嘅嫲嫲進行心肺復甦，無幾耐另一個啱啱做完手術嘅醫師亦趕到病房。





醫生同護士嘅神情，宣告咗林林唔想接受嘅壞消息。

嗰一刻嘅林林，腦入面重播返第一次見到嫲嫲嘅情景。

「乖呀下乖孫⋯無事架喇。」

我唔乖呀⋯⋯我有事呀⋯⋯咁你係咪就會再好似嗰日咁，摟實我？