是咁的，照顧過我嘅護士死咗: 三百五十六、最後一科

「林林呀，咳。你聽日考試，最後一日。加油呀。」

會考最後一科，前一晚林林如常去醫院照顧嫲嫲。

臥床不起嘅嫲嫲已經每日都迷迷糊糊，好少聽到佢咁清楚咁講說話。

林林好清楚，嫲嫲嘅鼻喉情況令佢每講一個字都會好痛，所以好耐都無聽過佢把聲。

但唯獨考最一科前嗰晚，嫲嫲好似特別精神。





「嫲嫲，你⋯⋯你講到野？係咪覺得好咗？」

點頭。

「你放心啦，我好有信心一定全科合格架，之後我就會報護士學校，你要等我呀，我好快可以做到護士。到時等我嚟照顧你！」

點頭。

「你⋯⋯仲有無，咳，吸毒呀？」





「無呀嫲嫲，我無吸過，將來都唔會。絕對唔會！」林林捉緊嫲嫲粗糙嘅手心，想佢感覺到自己嘅決心。

嫲嫲面上嘅肌肉用力咁擠出一個微笑。

「咁就好喇。咳咳。聽日考試，加油呀，乖孫。」

「知道！」