是咁的，照顧過我嘅護士死咗: 三百一十八、關心

車窗外嘅光影喺我同林林身上流轉。

右手嘅痛楚慢慢增加，連抬起嘅手臂都又攰又痠。

巴士駛入紅隧，林林瞓得好冧，唔知佢又隔咗幾耐無休息過。

無幾耐就到金鐘，我幾唔願意都好，都要叫林林起身。

佢擘大眼嘅時候，見到我用打咗石膏嘅手托住佢額頭，即刻醒咗。





「你做乜呀？隻手唔可以受壓架！」

我放返低，表情因為痛楚而那埋一嚿。

「唔緊要啦，咁你瞓得舒服啲吖嘛。」起碼唔會幾分鐘就跣咗個頭落嚟醒一醒。

林林不滿咁叉腰望我，之後抬起我隻手幫我檢查。

「好彩無咩事咋。」





我向佢伸一伸脷，然後㩒鐘落車。