是咁的，照顧過我嘅護士死咗: 三百零三、超自然現象
雖然佢依個樣好得意，但我已經準備好反駁十八子嘅基本邏輯謬誤。
「假設林林真係會呃我，但我乜都無架喎，連錢都無，林林可以呃我乜野？」
十八子面色一變，好似覺得我好蠢咁「嘁」咗聲。
「年中咁多單大陸女人落嚟呃感情呃公屋假結婚分身家，啲阿叔都以為自己無野被人呃架啦。點解咁多例子畀你睇都唔信邪啫？你就係典型嗰啲公屋馬會阿叔咁，成世都無女人鍾意過，人地一對你好少少就以為係真愛，結果最後咪人財兩空咯。」
「吓⋯⋯你意思係林林想呃我錢呀？佢做護士仲搵得多過我啦。」點解會得出咁嘅結論架？
十八子搖頭嘆氣：「咁你點解釋佢可以同你溝通到嘅超自然現象？」
吹到另一個女人同我傾到計係超自然象⋯⋯
「如果有人同我講見到外星人，同有人見到你同個靚女傾計，我會信有外星人。」
十八子如入無人之境咁重創我嘅自尊心，雖然本身都無乜。