是咁的，照顧過我嘅護士死咗: 三百零二、你鬼會心痛

「做咩？」

「大雄腥咗段新聞嚟，話中國有人確診第一單超級肺炎，有機會傳嚟香港，叫我返工小心啲喎。」十八子一邊打字一邊回答。

「佢都幾關心你喎。」

「佢係架，估唔到真係幾好。」佢甜甜一笑，放低電話。

「啱啱講到邊？啊，佢係有興趣一定會開話題囉，下一句你自己唔識推論咩？對你無興趣咪唔開話題！」





「咁林林對我無興趣的話，又點解釋佢一定會回我呢？」

十八子反白眼：「禮貌嚟咋嘛！」

佢仲係嬲爆爆咁嘅樣，睇到佢因為我一路講啲喺佢眼中係吳京大腦嘅說話，所以愈嚟愈燥底。

「其實點解我每次講起林林你都起哂鋼咁嘅？」

十八子用力吮咗啖珍珠奶茶。





「驚你被人呃咯都話。靚女喎，你諗下成世人除咗我仲有邊個靚女可以同你正常雙向咁傾計吖？」

又真係無⋯⋯

「我唔想你又好似當年咁傷心呀。見到你傷心我會心痛架嘛。」

「唓，你鬼會心痛。」

十八子即刻大聲反駁：「我會囉。」