是咁的，照顧過我嘅護士死咗: 二百九十四、德仔老豆
德仔老豆一九九四年喺皇室堡被劫匪殺死，多得當時有個身穿黑色西裝嘅飛刀手制服咗班匪徒，德仔先無事。
聽林林講，德仔係由嗰陣開始鍾意男人。嗰位叫阿漆嘅男人後來仲寄咗一千蚊帛金畀德仔一家。
德仔向來對豬肉佬情有獨鍾，只係豬肉佬通常都唔係同性戀，加上無乜邊個又有憂鬱嘅眼神同唏噓嘅鬚根，所以最後就死咗心。
不過德仔媽媽就突然之間要一個人揹起頭家。
佢無咩奢求，只希望個仔正正常常、生生性性。偏偏德仔喺佢眼中連基本嘅「正常」都達唔到，所以佢先一怒之下同德仔斷絕關係。
德仔嘅黑白相喺靈堂中間，微笑住面對我地列成一排嘅親朋戚友。
「你個衰仔⋯⋯直到死都要丟我架。」
我忍唔住想上前，但林林捉住我。
佢向我微微搖頭：「交畀我。」