是咁的，照顧過我嘅護士死咗: 二百八十九、佢究竟有咩好

「佢究竟有咩好呢其實？」阿連曾經問過。

老實講，我列唔出鍾意林林嘅理由。雖然一開始係受佢嘅外貌所吸引，但我記得唔係一見鍾情。

我入院嘅次數多，所以成日都見到林林東奔西跑，頻頻撲撲咁去照顧病人。

我點諗都諗唔通，到底佢係因為受過咩刺激而要咁努力去照顧病人呢？

我一直對依個問題好好奇，但又無機會問佢，亦無膽問佢，所以就帶住依個疑問，愈嚟愈留意依個女仔。





不過無論觀察幾耐，都搵唔到答案。

佢唔似追求緊其他目標，畀人嘅感覺就好似「依度就係終點」咁樣。

後來結合德仔嘅講法就知，林林唔會有得升上去，即係佢無追求升職嘅目標。

以前嘅我係一個一直唔知自己想做乜嘅人，雖然本來想做畫家，但被媽媽封咗條路之後，我就失去咗夢想。

但林林係真心享受做護士同照顧病人時候嘅每分每秒，亦即係佢已經夢想成真。





並唔係將「照顧病人」當成達到某個目標嘅踏腳石，而係夢想嘅終點。

只要有得照顧病人，佢就滿足。所以佢每日都好滿足。