是咁的，照顧過我嘅護士死咗: 二百八十五、阿連嘅大腦容量
當然啦，阿連嘅大腦容量仲停留喺128kb嘅階段，處理唔到咁多隱藏訊息。
睇完就吸收，唔會問點解，亦唔會思考點解，更唔好講咩邏輯同推論喇，夾硬嚟我驚佢塊底板會燒。
做一個廢紙切割員，食瞓屙同返工，最多得閒計下百佳優惠，128kb容量夠使有突。
不過就算好似我咁腦容量高啲，咪又係同佢一樣做緊冗員⋯⋯
有時人蠢啲，對個社會冷漠啲，睇唔出問題所在，反而係一種幸福。所謂「無知是福」就係咁解。
問題係知咗嘅野唔可以當無知過，等同解釋咗魔術嘅原理之後，再睇同一個魔術都唔會覺得神奇。
只要知咗，就無得變返做無知嘅自己。
「袋依個人工就代表唔可以犯錯架啦，一個錯誤影響緊一條人命架嘛。不過都難怪，愈嚟愈多讀唔成書嘅走去讀護士。」
其實護理學比較多係實用技巧，讀書叻唔叻都好，付出對等嘅時間同練習就做得到。
「你夠讀唔成書，唔見你讀護理？」