是咁的，照顧過我嘅護士死咗: 二百八十四、引入海外醫護

同阿連一齊嘅時候，世界好似無乜點變過，佢依然係個無女又懶理社會問題同政治冷感嘅政府冗員。

而我就仍然係個成骨不全同無自信表白嘅毒撚。

阿連一路睇蘋果動新聞近日嘅醫護示威，一路發表佢嘅睇法。

「你唔滿意頂唔順咪唔好做囉，又貪高人工又要嫌辛苦。依啲就正宗嘅又要做雞又要攞貞節牌坊喇。」

「呃⋯⋯其實貪高人工嗰啲會做金融。」





一心為賺錢嘅人，由中學揀科已經讀咗商科，其實做醫師護士只係相對高收入，唔會發達。

當做金融嘅朋友話閒閒地簽張單都十幾萬落袋嘅時候，如果我係貪錢多嫌辛苦嘅醫生，會索性轉行做金融的男人。

「啲醫生護士一味話忙，忙中有錯，人之常情。一講到開放外國醫護就不了不了，仲唔係自己攞嚟。」

有無諗過講不了不了嗰堆人其實唔係同一班人？忙到七彩嗰陣，邊個仲會諗住咩「保障業界利益」依啲假大空嘅概念？請個人幫下手好過啦。

但同時真係落實亦存在其他問題。開放外國醫護，真正高質素嘅醫生護士喺外國每日睇幾個症，一落香港要睇幾十個症，除非一開放就有一大堆外國人擁入嚟，令睇症嘅數目維持正常水平。





任何政策啱啱開始都一定無可能吸引到咁多人，咁邊個本身舒舒服服嘆緊世界嘅外國人會嚟同你癲辛苦自己？救香港？同你有親呀？佢又唔係香港人。就算要貢獻都幫咗自己國家同國民先啦，幾時輪到香港？

如果政府嘅引入政策異常吸引又另計，但喺工作環境一定係地獄嘅情況下，唯有提升待遇同薪酬。依個只會縮醫療開支嚟起沉降橋同噴水池，遮唔到雨嘅瓦遮頭同高鐵人工島嘅政府，有得幾多錢吸引外國嘅優質醫護人員？

仲要全世界嘅醫療人手都處於短缺況態，人地自己都搶外援，香港夠資源同人搶嗟？加拿大以技術移民吸引醫護人員過去，人地加拿大人潔地靈就話有吸引力，香港依個地方就算開放醫療技術移民都唔會有人理你。

結果所謂嘅「海外」都係變成大陸，而現行嘅執業試大部分肥佬嘅都係大陸人。如果免考試開放來港，等同於增加一堆本身唔合格嘅人嚟幫手，只會愈幫愈忙。