是咁的，照顧過我嘅護士死咗: 二百八十、上車

「不過以後⋯⋯就無咗個好姐妹陪我一齊捱ward喇。」

林林望住手機新聞嘅眼中有感動，亦有無力，但最多嘅始終係悲傷。

「如果可以，我唔想德仔係泛起漣漪嘅石頭。」

佢講下講下，淚水就再湧出眼眶。

「但既然佢已經化成漣漪，我希望盪起嘅波紋有幾遠去幾遠，持續到幾耐就幾耐。」





林林愈講愈失控，我都唔知點安慰佢好。

佢自己拎紙巾擦眼淚，終於起身：「唔好意思⋯⋯畀你見到我喊成咁⋯⋯」

又一班地鐵駛入月台，林林頭也不回就跳咗入去。

「林林！」

我唔希望睇住佢流眼淚嘅背影遠去，所以喺我大腦思考之前，已經本能咁開口叫咗佢一聲。





林林轉身，同我對望。

我應該同佢講啲咩呢？

「拜拜。」佢輕輕向我揮手。

「請勿靠近車門。」

我應該講咩⋯⋯先可以安慰到佢？





「嘟嘟嘟嘟嘟嘟⋯⋯」

「你要加油！」同時，車門關上。

列車駛離月台，林林望住我，慢慢遠去。

我唔知最後句加油，佢到底聽唔聽到。