是咁的，照顧過我嘅護士死咗: 二百七十七、煙酒

「之後我因為失哂控，完全唔收手，佢地先唯有叫警察嚟處理。」林林有啲尷尬。

「請勿靠近車門⋯⋯」

「你都⋯⋯打得佢幾傷喎。」

林林搲一搲面頰：「以前打得爛仔交多。」

我有啲驚訝咁望住佢。





「唔使咁驚喎，我以前係不良少女嚟架。」

諗返琴晚佢又食煙又飲酒，而且仲同嗰個大家姐咁熟，又覺得係合情合理。

「都係好難想像⋯⋯」

「我細個嗰陣都幾曳。不過以前飲得太多，琴晚飲幾多都唔醉。可能依啲就係報應。」

以前飲醉係尋求快感，到大個飲醉係想逃避痛苦，但佢飲極都唔醉，結果都係要面對。





「我都唔知你原來又食煙又飲酒。」

「其實我戒咗煙同酒好耐，不過真係頂唔住德仔自殺依個消息，先去搵大家姐放鬆下神經啫。」

好彩林林唔係煙剷酒鬼。太大壓力而用返以前嘅壞習慣舒壓，我可以理解。

等同阿連每次失戀都飲酒一樣。