是咁的，照顧過我嘅護士死咗: 二百六十一、老豆

媽媽後生嗰時係個大家閨秀，知書達禮，十指不知陽春水，係個典型嘅千金小姐。

但通常依種女仔最後都不知世途險惡咁被人呃。

如果男方純粹呃感情，可以令媽媽早啲認知到世界幾咁黑暗，同時早啲斬纜，其實未嘗係壞事。

我老豆係個爛賭鬼，偏偏為咗呃我媽媽，竟然有好長一段時間忍手唔賭。

上兩代，即係我阿公係講求竹門對竹門，木門對木門，鍾意個公屋出生嘅爛仔？絕對無得傾，於是喺我媽媽結婚之後就將佢逐出家門。





點解結婚之後呢？我阿公都唔係蠢人，佢一早睇穿我老豆嘅如意算盤係想謀佢啲錢，但我媽媽梗係死唔信，於是阿公就好絶咁喺一切都無得挽回之後，先至採取行動。

斷絕關係之後，老豆本身諗住無限任用嚟賭錢嘅大金庫化成泡影，頓時現形。

自此，我媽媽就為咗個「愛」字，搞到乜都無哂。

而老豆，亦因為計劃失敗，故態復萌，又出去賭錢，只能話狗改不了吃屎。

媽媽試過喊哂咁返屋企求阿公阿婆原諒，但阿公好狠心，話：「你大個女，唔係所有錯都可以得到原諒，一切錯誤都有後果。當日你唔聽我講，今日你就自己承受返懲罰。」





之後媽媽就死咗心，無再同屋企聯絡，懷住對阿公嘅忿恨繼續過日子。