是咁的，照顧過我嘅護士死咗: 二百四十五、飲醉

我依照慣例陪阿連到凌晨，佢一飲大兩杯就好吹得。

唔知由幾時開始，阿連每次飲酒都會喊。

我記得我地仲係十幾歲嗰時，阿連依種公屋爛仔已經飲緊酒，嗰時佢每次飲酒，都笑得好大聲，好燦爛。

照慣例，阿連半醉咁將自己咁多次被人飛嘅經歷重播一次，精準無誤，好似錄音機咁。

我記起喇，好似係廿一歲嗰年嘅聖誕節，阿連就係由嗰時開始，直到依家五年入面，每次飲醉酒都喊到收唔到聲。





聽落雖然好似每個前度都傷得佢好深，但應該有其中一個係傷得佢最深。

我好清楚自己無辦法幫到佢任何野，負能量釋放唔到亦唔可能轉化。

一係就佢自己放低執著。

一係就令佢受一次更大嘅痛苦。

只有兩者之一，先可以令佢忘記五年嚟一直耿耿於懷嘅痛苦。





我只能夠一直陪喺佢身邊，一次又一次咁聽依部錄音機播放相同嘅內容。

當然，作為朋友，我唔希望阿連再受一次更大嘅痛苦。

港豬還港豬，見到佢喊到無哂氣，好似條被人丟上岸嘅魚咁伏喺枱上無聲唞氣，我都會心痛。