是咁的，照顧過我嘅護士死咗: 二百四十四、雜果一拳

寂寞嘅阿連話為咗擴闊社交圈子識多啲朋友就開始秘密咁玩交友app，當然以佢嘅尊容要同人配對有一定難度啦。

幾經辛苦同人配到，傾咗個幾星期覺得幾啱嘴形就約咗琴晚出街食飯。

「咁食完飯佢就話要去做facial，咁佢話佢去做喳嘛！我咪陪佢囉，點知上咗去就奶野喇！」

阿連一路講一路飲，又開始面紅。

「講明先你再酒精中毒我唔會揹你去醫院架。」





「得啦得啦。」

人類總是要犯同樣的錯誤。

我同阿連如常喺平日近廣華醫院嘅酒吧飲酒，不過今日有另一班女仔喺度狂歡緊。

嗰幾個mk妹一齊著住半透明嘅白上衣同摟屌裙配黑絲，有啲個頭五顏六色有啲成身公仔，又煙又酒，細聲講大聲笑。

我稍為望一望佢地都被人睥實，即刻專注返喺阿連嘅被呃奇遇上，好彩背住班女，無眼屎乾淨盲。





噹啷。

「歡迎光臨。」

酒吧嘅客人來來往往，酒保為我地再送上飲料。

阿連飲沙灘上的性愛，佢話因為佢好缺。如果飲一杯等於做咗一次，今次就唔係酒精中毒，係精盡人亡。

至於我就飲對身體無害嘅雜果一拳。