是咁的，照顧過我嘅護士死咗: 二百一十四、唔係為錢？

返到公司，扮下工咁又到食飯時間。

食完野再繼續扮工，主要工作包括睇連登、掃ig同碌facebook，實際工作時間少於兩小時。

除之以外，仲多咗一項例行工作，就係每三個字就望下林林有無上線。

見到佢上線，但無搵我，又會失落。不過唔睇又唔安樂，我真係犯賤。

阿連用力一推，連人帶凳滑咗去我旁邊，伸頭𥄫我做乜，我即刻鎖咗部手機，但都係遲咗一秒。





「你沈哂船喎睇嚟。」

「多事啦。」

「你買個名牌包包換佢鮑鮑啦。」

我死魚眼咁望住阿連：「林林唔係拜金女呀，佢做護士都唔係為錢做架。」

佢忍唔住「噗」咁笑咗出嚟：「唔係為錢？我唔信呀。」





「護士有分註冊護士同登記⋯⋯」

我試圖將德仔講解我聽嘅醫護人員資訊話畀阿連聽，從而解釋林林點解唔係為錢。

「得得得，你講咗我都唔會明。」但我未講哂已經被佢閘斷咗。

我真係燥燥地。