是咁的，照顧過我嘅護士死咗: 二百一十三、對牛彈琴

阿連無哂癮，繼續睇蘋果動。

「哇非洲有新型病毒喎。」

「你無聊到連啲冷門新聞都睇呀？」

「睇港聞日日都講沙中線沈降無上螺絲，一係就港鐵撞完車又加價，再唔係就反咩明日大愚，睇到煩。咪睇下國際新聞囉。」

我同阿連相反，睇親都係港聞，自己屋企發生咩事都唔睇，算咩香港人。





「睇完又點？改變到咩？唔好唔記得我地仲打緊政府工架。啲後生仔屌政府就大大聲，到要搵食嗰陣咪又係聽到鐵飯碗就濕哂。」

都未去到改變嗰部分，只係講緊去了解啫。

香港嘅新聞值得睇，係因為仲未有太大陣河蟹味。

「依幾年再唔睇，遲下無得你睇架喇。」

好似cctvb咁，到時就係做維穩，唔係做新聞。遲啲沙中線斷咗都會報無死人，仲會出現一堆追討賠償失敗而被打壓嘅「沙中線母親」。





「未確認呼吸道冠狀病毒⋯⋯死亡率高達百分之二十五⋯⋯嘩，咁咪好勁？當年沙士死亡率都係十五%咋喎！」

阿連無視我繼續睇國際要聞，我亦懶得繼續對牛彈琴。